A sede de Norvento en Lugo permanece 100% operativa durante o apagamento

• A subministración de enerxía eléctrica ao Centro de Innovación Norvento Enerxía, xunto a todos os sistemas da empresa, mantivéronse ininterrompidos en todo momento grazas á microrrede que autoabastece o edificio unicamente con enerxías renovables e almacenamento.

• A sede, inaugurada en 2018, é un claro exemplo de independencia enerxética, grazas a un sistema que opera desconectado da rede eléctrica e que é un dos poucos casos de uso esta tecnoloxía, tamén deseñada e fabricada pola empresa, nun edificio corporativo.

• Norvento leva máis de 40 anos traballando nun modelo enerxético alternativo, descentralizado e autóctono, baseado na independencia enerxética e tamén tecnolóxica como piares.

O Centro de Innovación Norvento Enerxía -CIne-, sede da empresa en Lugo, mantívose 100% operativo en canto a subministración eléctrica e funcionamento de todos os seus sistemas durante o apagamento xeneralizado que afectou onte á Península Ibérica, grazas á súa independencia enerxética.

O edificio CIne conta cunha microrrede desconectada enerxéticamente da rede eléctrica, que lle permite continuar operando de forma autónoma en todo momento, xa que produce enerxía no punto de consumo a partir de fontes renovables e conta un sistema de almacenamento en baterías que traballan sincrónicamente para asegurar a constante subministración.

Enerxía eólica, fotovoltaica, biomasa e sistemas de almacenamento en baterías dirixidos por convertidores de electrónica de potencia intelixentes, todo iso tecnoloxía deseñada e fabricada integramente por Norvento en Lugo, permiten a CIne manterse plenamente en funcionamento en momentos críticos como este, pero tamén as 24h do día, os 365 días do ano. A microrrede que autoabastece a sede aproveita tamén a auga da choiva e recicla augas grises, nun sistema completo que actúa como unha illa. Trátase dun dos poucos exemplos de total independencia enerxética a nivel nacional nunha sede corporativa.

Norvento é unha empresa enerxética e tecnolóxica, con máis de 40 anos de traxectoria traballando nun modelo enerxético alternativo, independente e autóctono, que aposta por sistemas de xeración preto do punto de consumo, baseados na enerxía distribuída, co obxectivo de que cada empresa, comunidade e mesmo persoa poida producir a súa propia enerxía e autoabastecerse.