A Circularidade da Enerxía

Chamamos economía circular a aquela actividade económica que satisfai as necesidades humanas sen impacto neto e persistente sobre o medio no que habitamos. É por tanto harmónica co equilibrio alcanzado na natureza tras miles de anos de evolución. En contraposición atopamos a tradicional economía lineal na que se extrae, crea, usa e se tira.

A circularidade da actividade humana é considerada clave na sustentabilidade a longo prazo, motivo polo cal é impulsada por estratexias europeas de primeiro nivel como Europa 2020. A enerxía non é allea á circularidade e entra a través do concepto de waste-to-energy [1], segundo o cal se empregan residuos para producir enerxía, enmarcando técnicas tales como a incineración, gasificación ou a dixestión anaerobia.

Estes residuos pódense utilizar para producir electricidade, calor, biocarburantes ou mesmo novos materiais. Entre outros residuos valorizables atopamos os agrícolas (como as cascas e restos de poda), os de gandería (como os xurros) e os da industria alimentaria. Para unha introdución rápida ao potencial da bioenerxía podes ver este vídeo.

[1] The Role of Waste-to-Energy in the Circular Economy, Comisión Europea: http://ec.europa.eu/environment/waste/waste-to-energy.pdf