Calidade de subministración

O acceso a unha subministración de enerxía fiable é catalizador de actividade económica e polo tanto impulsor de calidade de vida. En economías avanzadas que alcanzaron cotas elevadas de produtividade, os problemas de fiabilidade na subministración son menos frecuentes, pero xeran un impacto de maior relevancia. Con todo, en economías menos avanzadas ou que se desenvolven en zonas máis remotas en termos eléctricos, os problemas de inestabilidade son maiores, aínda que a actividade local soubo adaptarse a eles, en parte renunciando ao desenvolvemento; de forma similar ao que ocorre con outras infraestruturas, como a auga ou os transportes.

Institucións tan diferentes como o Banco Mundial ou a Fundación Rockefeller non son alleos a esta problemática. Ambos participan en proxectos destinados a mellorar o acceso existente á electricidade en países ou zonas con baixo desenvolvemento, onde a electricidade é pouco confiable e en ocasións inexistente. Como exemplo, a iniciativa pola cal o Banco Mundial aprobou un crédito de 60 millóns de dólares para axudar á República de Benín a mellorar o seu sistema enerxético. Benín é un país africano no que unicamente o 29% dos fogares teñen acceso á electricidade e, ademais, a subministración na maioría dos casos prodúcese de forma intermitente, habendo zonas electrificadas cun nivel de calidade moi pobre. Paralelamente, a Fundación Rockefeller traballa con iniciativas como esta para que cada persoa teña acceso fiable á enerxía, baixo a premisa de que dito acceso é fundamental para eliminar a pobreza.

O problema da calidade de subministración non é exclusivo dos países subdesenvoltos. As zonas rurais de Europa, onde viven a metade dos habitantes deste continente e que ocupan o 90% do territorio, tamén o sofren. A iniciativa FREE (Future of Rural Energy in Europe) propón e promove o uso de fontes de xeración distribuída para mellorar a eficiencia enerxética, contribuír á seguridade da subministración e axudar a reducir as emisións de gases de efecto invernadoiro.

A implantación de microrredes avanzadas xa está permitindo a subministración fiable de enerxía en zonas remotas, empregando fontes de enerxía limpas e tecnoloxías de almacenamento. Eu persoalmente traballo no equipo de Microrredes de Norvento, dende onde desenvolvemos sistemas off-grid abastecidos por renovables.