Cara a unha enerxía limpa

Existen poucas dúbidas do impacto da actividade humana naqueles ecosistemas que habita. Unha das formas de impacto máis coñecidas é o cambio climático que, a diferenza doutras, afecta a escala global. Pensando non só neste impacto, senón tamén noutros que de forma directa afectan á saúde das persoas, fauna e flora, sabemos que a xeración de enerxía ten un papel clave, sendo fundamental que leve a cabo de forma limpa.

A belixerancia dos humanos contra aqueles elementos que ensucian o noso planeta é crecente e, aínda que non é suficiente, existen mostras indubidables do compromiso a distintos niveis para respectar máis o planeta no que vivimos. Dende Europa apóiase o desenvolvemento dun sistema enerxético concienciado co devandito respecto por medio do terceiro reto social derivado da estratexia Europa 2020 denominado Enerxía segura, limpa e eficiente.

A nivel global, as Nacións Unidas definiron 17 obxectivos de desenvolvemento sostible para transformar o noso mundo, dentro dos cales se atopa o obxectivo número 7: «Garantir o acceso a unha enerxía alcanzable, segura, sostible e moderna para todos». Organizacións como IRENA (International Renewable Energy Agency) dan soporte aos países na súa transición cara a un futuro enerxético sostible e serven de foro no que os países intercambian experiencias, visións e compromisos, como se mostra neste vídeo da asemblea deste ano.

A iniciativa privada é tamén importante para afrontar estes retos. A industria do capital risco combinada co soporte proporcionado por programas públicos para impulso do I+D son clave para impulsar o nacemento de tecnoloxías enerxéticas limpas. Así atopamos grupos de investimento como o Clean Energy Venture Group, relacionado na súa orixe co MIT, que apoia proxectos tecnolóxicos con capital inicial e experiencia na creación de empresas que poñen a enerxía limpa no centro do seu negocio.

Os meus compañeiros en Norvento e eu mesma traballamos no desenvolvemento e na integración de fontes de enerxía limpas para axudar aos nosos clientes para ser enerxéticamente máis eficientes e reducir o seu impacto no noso ecosistema.