Enerxía para o mundo de mañá

Dende sempre o ser humano impactou o equilibrio existente no medio ambiente. A industrialización, que nos aprovisionou de ferramentas para ser máis produtivos e mellorar a nosa calidade de vida, permitiunos incrementar a escala do noso impacto sobre o planeta ata un extremo incomparable dende a nosa orixe como especie. A necesidade e uso da enerxía é sen dúbida un dos elementos responsables do devandito impacto.

Asumir esta responsabilidade, nun escenario de demanda enerxética crecente, é un paso esencial para comezar a poñerlle remedio de inmediato. Producir e consumir enerxía de forma responsable é un reto para as nacións e para os individuos, que consiste en conseguir cubrir as necesidades enerxéticas actuais e seguir crecendo tecnoloxicamente, á vez que non se compromete a calidade ambiental e os recursos das xeracións futuras.

A nivel gobernamental, un claro exemplo de recoñecemento e adquisición desta responsabilidade é o Acordo de París, no que 195 países se comprometen a tomar medidas para loitar contra o cambio climático. A nivel individual, os cidadáns concienciados van poder unirse a novas iniciativas, como xa son as cooperativas que abastecen aos seus clientes con enerxía puramente renovable ou como as plataformas de intercambio de enerxía nas cales vai ser posible que un usuario poida xerar a súa propia enerxía no seu fogar a través de fontes de enerxía renovables (por exemplo, con paneis solares instalados no seu tellado) e compartir o exceso co resto de usuarios de forma local (microrredes comunitarias) ou mesmo de forma global. Grazas a conceptos como blockchain, o intercambio de enerxía entre particulares, coñecido como P2P ou peer-to-peer, pode ser algo común no futuro. Na actualidade, xa existen proxectos piloto ao redor deste innovador concepto de intercambio de enerxía.

E mentres que estas plataformas se fan unha realidade… se como consumidor de enerxía queres contribuír ao seu uso responsable e coidar o medio ambiente para as xeracións futuras nesta ligazón poderás realizar un cálculo aproximado das túas emisións de CO₂.

Non esperes para te convertir nun consumidor responsable!