Enerxía sen ataduras

Dende os comezos da xeración eléctrica, a escala das centrais de xeración tivo un rol moi relevante na redución do custo da enerxía producida. Ata fai uns poucos anos, os únicos investimentos en produción eléctrica que tiñan lugar eran grandes plantas fósiles, nucleares ou hidráulicas que requirían investimentos equivalentes a centos de millóns de euros cando menos. Eses grandes investimentos deron lugar á existencia de poucas empresas de enorme tamaño, o requirido para soportar financeira e operativamente os activos de xeración.

A aparición de fontes renovables para a xeración eléctrica como eólica ou solar abriu a porta a novos contendentes en forma de pequenos produtores independentes de electricidade. A evolución das tecnoloxías de xeración renovable fixo que, máis aló de permitir investimentos menores que as das grandes plantas de xeración, tamén fai viables instalacións de tamaño moi pequeno. Así nace a xeración distribuída, rompendo coa exclusividade tradicional das grandes compañías de xeración, ao facer innecesario realizar un investimento enorme para gozar de enerxía a un prezo competitivo. Por iso, consideramos que a enerxía do futuro será independente porque permitirá, e xa permite, desenvolverse nun mercado cun maior número de participantes e cunha mellor competencia.

Como se despregará a xeración distribuída? En principio, nacerá como fonte de xeración encostada ao sistema eléctrico xa existente, tanto a escala doméstica como industrial. Posteriormente, iranse incorporando elementos tales como baterías, que permitirán aos seus usuarios gañar capacidade de xestión e de negociación co sistema eléctrico. E, aos poucos, constituiranse pequenas redes -coñecidas como microrredes- que integrarán fontes de enerxía renovable xunto con tecnoloxías de almacenamento, e permitirán aos usuarios reducir e mesmo anular a súa dependencia da rede eléctrica principal.

Avecíñanse tempos de cambio no mundo da produción da electricidade cun equilibrio de poderes moi diferente, avecíñase a Enerxía 4.0.