Enerxía sen riscos

O mix enerxético dos países está vivindo unha transformación sen precedentes e o protagonismo de fontes de enerxía consideradas sostibles a longo prazo é crecente, entendida a sustentabilidade fundamentalmente ao redor das emisións de carbono. O ser humano necesita sistemas eléctricos máis eficientes, máis limpos e ademais que sexan seguros para os seus habitantes.

Dende o Laboratorio de Enerxía Renovable e Apropiada, RAEL (Renewable & Appropriate Energy Laboratory) liderado polo Profesor Daniel Kammen, xa levan anos lanzándose a proxectos que tratan de deseñar, probar e difundir sistemas enerxéticos renovables e apropiados. Este laboratorio fundouse dentro do Departamento de Enxeñería Nuclear do Grupo de Enerxía e Recursos na Universidade de California Berkeley e defende que non só é importante que as fontes de enerxía sexan inesgotables, senón que ademais encaixen adecuadamente co contexto humano no que se emprazan.

De feito, a fisión nuclear podía considerarse unha fonte inesgotable de enerxía e, dende un punto de vista estritamente técnico, ser encadrada como Renovable. Con todo, aínda que cabe mencionar as altas medidas de seguridade que se establecen en torno ao ámbito nuclear, xera residuos radioactivos que poden causar problemas por verteduras ou fugas. Por iso, cunha óptica de impacto nulo, esta tecnoloxía tal e como a coñecemos hoxe non sería Apropiada por non ser plenamente segura. Veremos se no longo prazo as futuras plantas de fusión nuclear cambian este escenario.

Pola contra, fontes inesgotables como eólica, solar, mini-hidráulica ou bioenerxías están libres de incidentes relevantes para os que conviven con elas, o cal permite emprazalas preto dos seus usuarios.

En Norvento traballamos na integración de fontes de enerxía inesgotables , perfectamente Apropiadas e seguras para convivir cos nosos clientes nas súas mesmas instalacións.