Estabilización de rede con baterías

A capacidade instalada en proxectos de baterías conectadas aos nosos sistemas eléctricos multiplicouse por máis de 15 nos últimos 5 anos segundo a Axencia Internacional da Enerxía. Por que está a ocorrer? Existen dúas razóns fundamentais: por unha banda, a necesidade por parte dos sistemas eléctricos de que así sexa e por outro, os avances tecnolóxicos que fan que os sistemas de almacenamento, que combinan baterías con electrónica de potencia, sexan economicamente accesibles.

Os sistemas de almacenamento son un elemento clave para a transición enerxética, que nos leva dende fontes de enerxía como o carbón, gas natural ou nuclear, cara a fontes como a eólica ou fotovoltaica que carecen da posibilidade de modular a súa produción e escoller cando esta ocorre. A realidade técnica é que cada vatio adicional de eólica ou solar o sistema eléctrico require unha xestión máis complexa, que en caso de non producirse podería resultar nun corte da subministración. Isto ocorre porque os desequilibrios temporais entre produción e consumo son absorbidos pola inercia das masas rotativas nas nosas centrais convencionais, o que se manifesta en pequenas variacións de frecuencia. Cando as enerxías renovables desprazan ás convencionais o sistema perde parte da súa inercia e estas variacións son máis abruptas e difíciles de xestionar.

A presenza masiva de eólica e solar nas redes requirirá, e xa require, accións adicionais sobre as propias redes para asegurar a capacidade destas de manterse en equilibrio. Unha das formas de que redes con alta presenza de eólica e solar sexan capaces de operar de forma equilibrada é a presenza de sistemas de almacenamento que absorben de forma instantánea excedentes ou compensan a falta de produción renovable. Esa é unha das funcións do proxecto Hornsdale Power Reserve, no Sur de Australia, construído por Tesla e que representa unha capacidade de almacenamento de 129 MWh, capaz de entregar ata 100 MW cada instante. O servizo de equilibrado que este sistema de almacenamento presta á rede eléctrica australiana está remunerado polo operador, xerando ingresos para a compañía propietaria. Sen dúbida un marco retributivo adecuado como o que permitiu implantar este sistema en Australia é clave para a aparición destes proxectos en países nos que a penetración de fontes renovables como solar ou eólica está en crecemento.

Non pensemos que a única forma na que o almacenamento contribuirá a posibilitar unha gran presenza de renovables son os grandes sistemas de baterías. Nun futuro próximo numerosas industrias contarán con sistemas de almacenamento, mesmo o farán os particulares, sexa a través de baterías parte dos seus sistemas de autoconsumo ou a través das baterías dos seus vehículos eléctricos. A agregación de todos estes pequenos sistemas de almacenamento e a súa operación coordinada será fundamental para asegurar o equilibrio entre xeración e demanda nun mundo no que afortunadamente teremos moitas máis renovables contribuíndo á xeración de enerxía.

Por tanto, poñamos un ollo en ter moitas máis fontes de xeración renovable, pero non deixemos de poñer outro nos sistemas de almacenamento que o farán tecnicamente factible.

Queres saber por que están a ter éxito os sistemas de almacenamento con baterías? Entra no noso blogue nuns días e poderás ler un post completo respecto diso escrito polo noso experto Gerardo Medrano!