Hidróxeno

Comezamos xaneiro cun desafío tecnolóxico: o hidróxeno, que está a acaparar unha gran atención como vector enerxético e pode xogar un papel fundamental na transición enerxética. Este mes entrevistamos a Carlos Fúnez, responsable da Unidade de Innovación Aberta do Centro Nacional do Hidróxeno para que nos fale acerca das tecnoloxías de hidróxeno e células de combustible.

Que rol cre que xogará o hidróxeno na transición enerxética?

O hidróxeno vai xogar un papel clave na transición enerxética debido ao seu papel de vector enerxético e á capacidade que ten de integrar as enerxías renovables no sistema enerxético actual. Segundo o informe emitido polo Hydrogen Council (consello mundial do hidróxeno) titulado Hydrogen Scaling-up: A sustainable pathway for the global energy transition, para o ano 2050 o 18% da demanda de enerxía final será subministrada mediante hidróxeno, derribaranse 6 xiga toneladas anuais de CO₂, xerarase un volume de mercado de 2,5 trillóns de euros anuais e crearanse 30 millóns de emprego relacionados cas tecnoloxías do hidróxeno.

Como é a situación da investigación sobre hidróxeno en España?

En España temos unha capacidade de investigación realmente interesante en tecnoloxías do hidróxeno e pilas de combustible. Un exemplo moi claro é o Centro Nacional do Hidróxeno, que foi creado no ano 2007 precisamente para axudar ás entidades Españolas no desenvolvemento de tecnoloxías do hidróxeno e pilas de combustible, dotando ao devandito centro de capacidade técnica avanzada e de equipamento de primeiro nivel para todo o que é a investigación e desenvolvemento das diferentes tecnoloxías que implican a cadea de valor do hidróxeno.

Que países están máis avanzados no desenvolvemento de tecnoloxía baseada no hidróxeno?

Os países que están máis avanzados no desenvolvemento da tecnoloxía do hidróxeno son os que tiveron e teñen unha estratexia definida e un apoio gobernamental claro. En concreto a nivel europeo, os líderes en tecnoloxías do hidróxeno e pilas de combustible son Alemaña, Francia. Reino Unido, Holanda e Noruega. A estes países pódense sumar Xapón, Korea, China, Australia e EE. UU. (concretamente California).

Que tecnoloxías existen para a produción de hidróxeno?

A día de hoxe existen diferentes tecnoloxías dispoñibles para produción de hidróxeno, pero creo que as tecnoloxías de produción de hidróxeno realmente interesantes son as que proveñen de fontes de enerxía renovable. Neste sentido, as tecnoloxías máis relevantes son a electrolisis da auga mediante o uso de enerxías renovables e os sistemas de reformado, gasificación e pirolisis fundamentalmente de biomasa e residuos (urbanos, agrícolas, industriais etc.).

Pódese almacenar?

Claro que se pode almacenar. O vector enerxético hidróxeno ten como principal vantaxe fronte ao vector enerxético electricidade a facilidade de almacenamento. O hidróxeno, unha vez producido, pode ser almacenado durante o tempo que se considere oportuno e a cantidade necesaria, utilizando diferentes tecnoloxías dispoñibles comercialmente a día de hoxe como é o caso da compresión, licuefacción, hidruros metálicos, líquidos orgánicos, compostos químicos, etc.

E, unha última pregunta, que aplicacións finais pode traer o hidróxeno ao mercado?

O hidróxeno ten múltiples aplicacións finais. As máis representativas son: o uso de hidróxeno como combustible alternativo en vehículos, camións, autobuses, trens, barcos e mesmo avións, o uso de hidróxeno como sistema de almacenamento de enerxías renovables e a súa posterior conversión en enerxía eléctrica de forma que se poidan xestionar as plantas renovables, o uso de hidróxeno como sistema de estabilización de redes eléctricas. Tamén a xeración de hidróxeno e a súa inxección na rede de gas natural existente ata un 20% en volume, o cal permitirá reducir as importacións de gas natural no mesmo porcentaxe, a produción de gas natural sintético mediante a mestura do hidróxeno con dióxido de carbono mediante o proceso de Sabatier, ca posterior inxección do devandito gas natural sintético na rede actual de gas natural sen limitacións en canto a porcentaxe, a mestura de hidróxeno xunto con nitróxeno do aire para producir amoníaco mediante o proceso Harber-Bosch, o cal é utilizado en aplicacións como a industria dos fertilizantes, explosivos, refrixeración, etc ou a mestura de hidróxeno xunto con dióxido de carbono para xerar metanol mediante o proceso Fischer-Tropsch, o cal é utilizado como materia prima para diferentes industrias e para combustible en vehículos e vivendas.

Queres seguir lendo? Seguir con outro desafío.