Microrredes

Unha microrrede é un sistema eléctrico de pequeno tamaño capaz de operar de forma illada da rede e que engloba elementos de xeración distribuída, sistemas de almacenamento e cargas tanto controlables como non controlables. As microrredes caracterízanse pola súa gran heteroxeneidade en termos de potencia, tecnoloxía e aplicacións, apreciándose un aumento considerable de microrredes de moi diversa índole nos últimos 10 anos.

Este tipo de redes de pequeno tamaño terán un papel determinante na cobertura da demanda enerxética do futuro, tanto en industrias, fogares, como en servizos públicos; xa que permiten reducir emisións, mellorar a fiabilidade e calidade de subministración e reducir custos, como consecuencia dos drásticos cambios na estrutura de custos da xeración eléctrica que propiciou a ruptura das economías de escala.

Aínda que as primeiras microrredes avanzadas xurdiron como desenvolvementos experimentais de centros de investigación e universidades, o certo é que as súas valiosas prestacións movéronas rapidamente ata posicionalas nun papel protagonista nos plans e a concepción das redes intelixentes do futuro. A un nivel superior, xurdiu o concepto de “rede de microrredes” ou “microrredes fractales” como consecuencia de interiorizar as numerosas capacidades das microrredes non só para electrificar zonas rurais illadas senón para enerxizar os sistemas eléctricos máis modernos. Este concepto trata da operación das microrredes non só de forma illada senón interconectadas entre si formando unha rede superior, co obxectivo de extraer o máximo beneficio e alcanzar unha operación óptima das súas capacidades.

Dende Norvento impulsamos varias liñas de investigación e desenvolvemento relacionadas coas microrredes, traballando tanto en produtos especialmente concibidos para elas como na integración de produtos que naceron para traballar dentro dunha rede convencional. Sempre coa idea de prover aos nosos clientes de solucións tecnicamente moi robustas á vez que economicamente competitivas.