Nanotecnoloxía e grafeno

Hoxe, a nanotecnoloxía permite manipular a materia a escalas inimaxinables ata fai uns poucos anos. Dita manipulación permite aos científicos e enxeñeiros dotar de propiedades únicas, moitas delas non dispoñibles na natureza, aos elementos sobre os que se aplica. A modificación das propiedades microscópicas (máis precisamente nanoscópicas) ten impacto nas propiedades macroscópicas e, por tanto, utilidade en moitos ámbitos. Sen dúbida é un dos ámbitos tecnolóxicos con maior potencial disruptivo e que terá aplicación tanto na xeración, como no almacenamento e transmisión de enerxía, sen deixar de lado a eficiencia enerxética.

Como exemplo, a creación de estruturas a nanoescala permite obter compostos como o grafeno. Aínda que como composto aparece de forma natural en pequenas partículas en elementos tan cotiáns como a mina dun lapis, a ciencia traballa en controlar a síntese de partículas de grafeno que formen estruturas moito maiores, conseguindo propiedades macroscópicas revolucionarias. A Universidade de Manchester é referente mundial no uso do grafeno en aplicacións relacionadas coa enerxía, traballando, por exemplo, no desenvolvemento de baterías flexibles e lixeiras, capaces de ir adheridas á roupa e cun tempo de recarga e unha capacidade moi superior á que presentan actualmente. Outro exemplo son os supercondensadores de grafeno que, sendo liviáns, son capaces de proporcionar cantidades masivas de enerxía. Esta universidade convídanos a imaxinar un futuro no que poderemos recargar o teléfono móbil en segundos ou a batería do vehículo eléctrico en cuestión de minutos. Outra aplicación prometedora do grafeno é a levada a cabo no Instituto Tecnolóxico de Massachusetts (MIT) e son as células solares flexibles e transparentes, capaces de adaptarse a calquera superficie sen perder as súas propiedades, practicamente como unha lámina adhesiva.

A aposta global pola nanotecnoloxía e polo grafeno é elevada, as expectativas grandes, e o potencial enorme, polo que desde Norvento seguimos con atención os resultados que abren progresivamente novos camiños de aplicación á tecnoloxía enerxética.

De acordo coas palabras do Profesor Feynman: «No fondo hai espazo dabondo».