Parques eólicos flotantes a gran escala

A ninguén se lle escapa que o potencial do vento existente sobre a superficie do mar deberá ser aproveitado se queremos un futuro enerxético moito máis renovable. A existencia de bos emprazamentos en terra en termos de recurso eólico dispoñible para novos parques é limitada, ao que se pode engadir que o vento no mar adoita ser máis constante e presentar un fluxo máis laminar. Non obstante, nalgúns países, como é o caso de España, a profundidade do leito mariño crece moi rápido ao saír ao mar, o que fai imposible cimentar un aeroxerador nel.

É por iso polo que expertos de numerosas disciplinas están a avanzar no desenvolvemento de sistemas flotantes para extraer enerxía eólica. Existen varios proxectos de I+D onde empresas, universidades e centros de investigación traballan xuntos para conseguir plena viabilidade económica da eólica offshore flotante, isto é que produza electricidade polo menos igual de barata que outras fontes renovables. Algúns deles recibiron e reciben soporte financeiro por parte de Demowind 1 e 2, que distribúe fondos do programa Horizonte 2020 da Unión Europea.

Un dos cabalos de batalla fundamentais é o sistema empregado para xerar flotabilidade. Un deseño óptimo debe conseguir estabilidade para o aeroxerador, insensibilidade á ondada, lonxevidade, e por suposto economía na súa fabricación e despregamento. Existen distintos conceptos de plataforma flotante, como a desenvolta por Flowocean, a de Ideol, ou a de X1 Wind. O deseño patentado por Flowocean consiste nunha plataforma que sostén dous aeroxeradores simultaneamente, que é semisumerxible e que utiliza tecnoloxía TLP (Tension Leg Plataform).

https://www.youtube.com/embed/Fw-u9P2V1Vk?enablejsapi=1&wmode=opaque

Pola súa banda a plataforma de Ideol, que pode ser construída en formigón ou aceiro en localizacións próximas á planta, ten forma de anel e permite sen modificacións soportar todo tipo de turbinas eólicas. Finalmente, destacar a patente X1 Wind, cuxa idea conceptual é do enxeñeiro español Carlos Casanova e que consiste nunha plataforma moi lixeira (tamén semisumerxible e con TLP), que evita o uso de torres nos aeroxeradores e na que o vento que incide sobre as pas do aeroxerador faino por detrás (downwind). Este innovador proxecto, que recibiu fondos do programa Horizonte 2020 e que está apoiado por InnoEnergy, ten previsto despregar un prototipo na costa de Gran Canaria.

https://www.youtube.com/embed/U-7WBA4hBp0?enablejsapi=1&wmode=opaque

Para abaratar as devanditas plataformas flotantes é clave reducir a masa dos aeroxeradores. Iso require optimizar o deseño destes, nalgúns casos pasando por novas tecnoloxías, por exemplo a que se desenvolve no proxecto Compact Holistic Efficient Floating Turbine, liderado pola empresa británica Magnomatics e no que Norvento participa achegando o seu coñecemento no deseño e proba de xeradores eléctricos. Neste caso, a tecnoloxía é altamente disruptiva e podería reducir a masa do xerador eléctrico drasticamente, reducindo esixencias estruturais doutros elementos como o chasis ou a torre e polo tanto alixeirando tamén estes.

Aínda que con moitos proxectos en camiño, existen a día de hoxe unicamente uns poucos exemplos de parques de enerxía eólica off-shore flotante no mundo, como o de Fukushima, ou o de Hywind Scotland, este último cun asombroso factor de capacidade do parque do 65%. Algúns expertos vaticinan que chegará de forma comercial ás nosas costas en 2025, e auguramos un enorme percorrido con vastas extensións de mar cubertas por aeroxeradores e sen apenas, ou ningún, impacto visual nas nosas costas. Enerxía barata e inocua para o consumidor.