Sistemas solares offgrid para vivendas

O acceso á enerxía é esencial para o crecemento das rexións máis desfavorecidas do planeta. A enerxía mellora a seguridade, a saúde, a economía e o desenvolvemento intelectual dos que conseguen acceder a ela. Facelo ademais de forma sostible, económica e medioambientalmente falando, foi e é, un gran reto que afortunadamente se atopa preto de alcanzar. É común que as poboacións máis pobres vivan en lugares remotos onde as redes eléctricas non poden chegar por motivos xeográficos ou por ser economicamente inviable. Estas poboacións dependen de queroseno ou outros combustibles enerxéticos que son caros, perigosos e nocivos para a saúde. Ademais, carecen de recursos económicos que lles permitan realizar o investimento inicial tan elevado que supón a adquisición dun sistema de xeración propio menos nocivo. Aínda que se trata dunha problemática que pode parecer afastada para algúns de nós, o certo é que afecta a máis de mil millóns de persoas en todo o mundo. Os profesionais da enxeñería, economía e socioloxía entre outros, temos a responsabilidade de traballar xuntos para liquidala.

Unha solución que empeza a ver os seus froitos, e que queremos destacar polo impacto tan elevado que está a ter na vida dalgunhas persoas e que potencialmente terá para aplacar o cambio climático, é a integración de sistemas solares off-grid para vivendas con sistemas de pago innovadores como o pay-as-you-go. O éxito desta alternativa débese a que en primeiro lugar, utiliza como recurso o sol, moi abundante en determinadas zonas do planeta onde ademais o nivel de electrificación é baixo, por exemplo ocorre en boa parte de África; en segundo lugar a tecnoloxía de extracción de enerxía é relativamente sinxela en comparación con outras, é madura, segura e cunha evolución de custos en continuo descenso. E en terceiro lugar, as novas metodoloxías de pago como o pay-as-you-go, que consiste en ir pagando o sistema de xeración de enerxía conforme se vai utilizando, permite aos habitantes con poucos recursos económicos dispoñer dun servizo antes considerado impensable para eles. Esta metodoloxía de pago pode levar a cabo a través de teléfonos móbiles, feito que facilita aínda máis a súa implantación en zonas rurais remotas onde os móbiles xa contan cunha elevada penetración. Esta, e outras metodoloxías de pago que poden atoparse neste informe, a calidade crecente dos produtos solares que se ofrecen aos habitantes e a creación dunha rede de axentes locais que difunden información e distribúen os produtos, están a motivar o desdobramento destes sistemas e incrementando a electrificación rural en países do continente africano e tamén de Asia. O programa do Banco Mundial Lighting Africa achéganos ao éxito destes sistemas en comunidades de Kenia.

Con outros tamaños e a escala industrial ou municipal no canto de doméstica, en Norvento apostamos pola enerxía solar como unha das pezas clave na electrificación presente e futura e observamos entusiasmados como a evolución desta tecnoloxía está a mellorar a vida de millóns de persoas en lugares remotos do planeta.