O Director Xeral de Enerxía e Minas e o Delegado da Xunta en Lugo visitan as obras do parque eólico de Norvento nos concellos de Abadín e A Pastoriza

• O proxecto está nunha fase moi avanzada de construción e xa están instalados os 10 aeroxeradores que compoñen o parque.  
• Terá unha capacidade de xeración de 34,65 MW e evitará a emisión de 50.000 toneladas de CO₂ ao ano.

Lugo, 20 de agosto de 2019.- Ángel Bernardo Tahoces, Director Xeral de Enerxía e Minas, e José Manuel Balseiro, Delegado da Xunta en Lugo, visitaron hoxe as obras do parque eólico de Norvento, compañía española de tecnoloxías de enerxías renovables, situado nos concellos de Abadín e A Pastoriza. Iván Nogueiras, Director Xeral de Norvento, acompañou os representantes da Xunta, guiándolles durante a visita e compartindo os detalles técnicos do proxecto. Á visita tamén asistiron os alcaldes de Abadín e A Pastoriza. 

A fase de construción do parque atópase moi avanzada e xa están instalados os 10 aeroxeradores que o compoñen. Eses aeroxeradores terán unha capacidade de produción enerxética de 34,65 MW e evitarán a emisión de 50.000 toneladas equivalentes de CO₂ ao ano. 

O proxecto foi posible grazas ao apoio da Dirección Xeral aos proxectos eólicos desenvolvidos na rexión. 

Avances dos proxectos de Norvento en Galicia 

Ademais deste proxecto, Norvento está a traballar na construción doutros 5 novos parques eólicos en Lugo, o que supón un total de 128,25 MW de potencia. Os parques, situados en Abadín, A Pastoriza, Mondoñedo, Riotorto, Trabada, A Pontenova e Lourenzá, estarán listos para operar antes do 31 de decembro e producirán unha cantidade de enerxía anual equivalente ao consumo eléctrico dun municipio de 90.000 habitantes. Desta maneira, Norvento mantén o seu compromiso co desenvolvemento sostible de Galicia e co medio ambiente, evitando a emisión de 4 millóns de toneladas de CO₂ equivalentes durante a vida útil dos parques. 

A construción e operación dos proxectos repercutirá en cuantiosos beneficios para os municipios que os acollen. Durante a vida útil dos proxectos xeraranse aproximadamente 19 millóns de euros para administracións locais e autonómicas en concepto de impostos. 

Os novos parques estarán controlados e xestionados tanto desde os centros de control situados nos propios parques como desde a sede da compañía, o Centro de Innovación Norvento Enerxía (CIne) en Lugo, un dos edificios máis avanzados de Europa en independencia e autoxeración enerxética mediante renovables, e que funciona totalmente desconectado da rede mediante enerxías limpas. 

Iván Nogueiras, Director Xeral de Norvento, afirmou que “estamos moi satisfeitos de seguir contribuíndo cos nosos proxectos ao desenvolvemento económico e social de Galicia, mediante a xeración de postos de traballo e a contribución á consolidación do tecido industrial do sector renovable”. 

Acerca de Norvento 

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética.

Con presenza en diversos mercados internacionais, Norvento conta hoxe cun total 750 MW de plantas de xeración renovable en operación, construción e desenvolvemento, tanto en España como noutros mercados.