O proxecto público-privado de I+D galego Fisterra presenta tecnoloxías como o xemelgo dixital ou realidade aumentada para fabricar un convertidor que reducirá as emisións do transporte marítimo

• Norvento TECHnPower, o Centro Tecnolóxico de Automoción de Galicia e a Universidade de Vigo presentaron esta mañá os avances da primeira fase do proxecto, no que se implementan estas ferramentas.
• Fisterra está dotado con máis de dous millóns e medio de euros, dos que o Instituto Galego de Promoción Económica da Xunta de Galicia, nunha iniciativa cofinanciada pola UE, achega o 60%.

Norvento TECHnPower, o Centro Tecnolóxico de Automoción de Galicia (CTAG) e o grupo de investigación Applied Power Electronics Technology da Universidade de Vigo presentaron esta mañá os resultados da primeira fase do proxecto de investigación Fisterra (Fábrica Intelixente e Sustentable grazas a Electrónica de Potencia Avanzada e Realidade Aumentada), lanzado en 2024 e con horizonte en 2026, cuxo obxectivo é reducir as emisións do transporte marítimo.

AVANCES DA PRIMEIRA FASE DE FISTERRA

Nesta primeira fase implementáronse tecnoloxías como o xemelgo dixital ou a realidade aumentada para deseñar un convertidor multimegavatio que supera os estándares actuais do mercado, capaz de substituír o consumo de combustibles fósiles por renovables nos barcos durante as súas operacións en portos.

O CTAG traballou nesta primeira metade de proxecto na construción dun xemelgo dixital, que simula fluxos de traballo en 3D e integra almacéns, operarios e ensamblaxes, permitindo optimizar o proceso de produción antes da súa implementación física.

Ademais, desenvolveu un sistema de realidade aumentada parametrizable que facilitará a incorporación de persoal menos experimentado ao proceso de fabricación, mellorando a aprendizaxe e reducindo erros, co obxectivo de axudar ao operario no desenvolvemento da montaxe de elementos do convertidor.

Pola súa banda, o equipo da Universidade de Vigo (UVigo) probou mediante simulacións a estratexia de control do convertidor a partir dunhas especificacións base iniciais, da experiencia previa en sistemas similares e da revisión da competencia, reforzando así a estabilidade.

Dende Norvento TECHnPower avanzouse no deseño de detalle do convertidor, así como co comezo da fabricación da primeira unidade prototipo, implementando os avances desenvoltos en materia de densidade de potencia, refrixeración híbrida (refrixeración líquida e HVAC) e a unidade de control avanzada, xunto coas sinerxias de optimización de procesos produtivos, creando un modelo que mellore as características preexistentes no mercado.

MÁIS SOBRE FISTERRA

Fisterra ten o obxectivo, con horizonte en 2026, de crear un convertidor de electrónica de potencia que permitirá reducir drasticamente o consumo de combustibles fósiles nos barcos durante a súa chegada, atracada e saída dos portos. Con esta aposta pola innovación, equipos de traballo galegos achegarán unha solución ao reto da descarbonización do transporte marítimo. Trátase dun asunto de gran importancia, xa que o 80% do transporte de mercadorías ten lugar por mar e que supón o 15% das emisións anuais de óxido de nitróxeno (NOx) e o 13% das de óxido de xofre (SOx).

Este proxecto de colaboración público-privada de I+D galego está dotado con 2.659.287,76 de euros. O Instituto Galego de Promoción Económica (IGAPE) da Xunta de Galicia subvenciona o 60% nunha iniciativa cofinanciada pola Unión Europea.