Entran en operación os seis novos parques eólicos de Norvento

• Todos os parques eólicos (Neda, Sasdónigas, Sasdónigas II, a Pastoriza, Cadeira e Carracedo) xa incorporan enerxía á rede eléctrica.

• A partir destes momentos, Norvento dispón de 242 MW en operación en España, e ao redor de 800 MW en desenvolvemento dentro e fóra do noso país. 

• Os novos parques evitarán a emisión de 4 millóns de toneladas de CO₂ durante os próximos 25 anos.

Lugo, 17 de decembro de 2019.- Norvento, compañía española de tecnoloxías de enerxías renovables, finalizou a construción dos seus seis novos parques eólicos que se atopaban en fase de desenvolvemento na provincia de Lugo. Desta maneira, a compañía cumpriu co prazo marcado para a súa tramitación desde que se adxudicase os proxectos na poxa do Ministerio de Enerxía (agora, Ministerio para a Transición Ecolóxica) de 2017. 

Os parques, situados en Abadín, A Pastoriza, Mondoñedo, Riotorto, Trabada, A Pontenova e Lourenzá, xa están todos operativos. De feito, catro deles, xa incorporan enerxía á rede eléctrica desde hai meses. Os parques supoñen un total de 128 MW de potencia e producirán unha cantidade de enerxía anual equivalente ao consumo eléctrico dun municipio de 90.000 habitantes. 

Coa finalización destes proxectos, Norvento suma xa 242 MW en operación en España, e conta con ao redor de 800 MW en desenvolvemento dentro e fóra do noso país. 

A compañía prevé que os novos parques axudarán a evitar a emisión de 4 millóns de toneladas de CO₂ equivalentes durante a súa vida útil. Doutra banda, a súa construción e operación supoñerán numerosos beneficios para os municipios que os acollen, esperándose que xeren aproximadamente 19 millóns de euros para administracións locais e autonómicas en concepto de taxas e impostos. 

Os novos parques contrólanse e xestiónanse tanto desde os centros de control situados nas propias instalacións como desde a sede da compañía situada en Lugo, o Centro de Innovación Norvento Enerxía (CIne), un dos edificios máis avanzados de Europa en independencia e autoxeración enerxética mediante renovables, e que funciona totalmente desconectado da rede eléctrica mediante enerxías limpas. 

Iván Nogueiras Pérez, Director Xeral de Norvento, destaca que “nos comprace cumprir en prazo e coas máximas esixencias de calidade e eficiencia coa folla de ruta marcada en 2017 tras a poxa eólica. Concluída esta etapa, agora seguiremos a traballar en prol do desenvolvemento de futuros novos proxectos, tanto no negocio de xeración centralizada como en autoconsumo e xeración distribuída con renovables”. 

Acerca de Norvento 

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva décadas operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. Con presenza en diversos mercados internacionais, Norvento conta hoxe con máis de 1000 MW de plantas de xeración renovable en operación, construción e desenvolvemento, tanto en España como noutros mercados.