Torre de Núñez despregará dúas instalacións de autoconsumo fotovoltaico de 200 kW de potencia da man de Norvento

• A compañía evitará a emisión de 83 toneladas equivalentes de CO₂ ao ano grazas ás novas instalacións fotovoltaicas das súas dúas fábricas situadas en Conturiz e O Corgo (Lugo).
   
• Trátase dunha das primeiras compañías cárnicas galegas en apostar polo modelo de autoconsumo fotovoltaico industrial no proceso de elaboración de xamóns como panca para reducir a pegada de carbono e impulsar o desenvolvemento sostible.

Lugo, 17 de febreiro de 2021.- A empresa especializada en elaboración de produtos cárnicos Torre de Núñez despregará da man de Norvento, compañía española de tecnoloxías renovables, dúas instalacións de autoconsumo fotovoltaico de 200 kW de potencia nas dúas fábricas que ten en Lugo. As novas instalacións contarán cunha potencia de 100 kW cada unha e evitarán a emisión dun total de 83 toneladas equivalentes de CO₂ á atmosfera cada ano. 

O proxecto é un exemplo de procura de sinerxías entre empresas galegas que apostan pola creación sostible de valor para a comunidade e por competir no mercado global mediante a transición enerxética como elemento diferenciador, tanto incorporando a sustentabilidade nos seus procesos produtivos, no caso de Torre de Núñez, como achegando solucións tecnolóxicas para facelo posible, no caso de Norvento. 

Concretamente, as instalacións terán lugar, primeiramente, na fábrica da compañía situada en Conturiz, que conta con 15.000 m² para a produción de embutidos, unha adega natural e unha capacidade de produción de 5.000 toneladas ao ano. E, en segundo lugar, na fábrica do Corgo, composta por un secadoiro de xamóns de 10.400 m² e capacidade para producir 600.000 unidades ao ano, así como unha instalación destinada á preparación en liscos do produto de 2.500 m² e capacidade para producir entre 7 e 8 millóns de unidades anuais. 

Como parte da aposta polo desenvolvemento tecnolóxico, as dúas instalacións poderán controlarse as 24 horas do día a través da aplicación ‘energy’ (dispoñible en Google Play e App Store) de Norvento, que permite ao usuario controlar o rendemento da súa instalación renovable en tempo real, consultar gráficos e datos históricos e exportar eses datos vía correo electrónico, así como recibir alertas e notificacións. 

Unha vez o proxecto esté executado, Torre de Núñez converterase nunha das primeiras empresas cárnicas galegas en apostar polo autoconsumo fotovoltaico industrial no proceso de elaboración de xamóns como panca para reducir a pegada de carbono e impulsar o desenvolvemento sostible. 

Neste sentido, José Manuel Núñez, CEO de Torre de Núñez, sinala que “Os proxectos de investimento de Torre de Nuñez pasan por seguir desenvolvendo a nosa actividade en Galicia sendo responsables coa nosa contorna”. Así mesmo, Iván Nogueiras, Director Xeral de Norvento, destaca que “a tecnoloxía fotovoltaica avanzou moito nos últimos anos, sendo máis accesible e escalable para proxectos de todo tipo e envergadura. Alégranos poder acompañar a unha compañía galega comprometida co desenvolvemento sostible e coa innovación como é Torre de Núñez no seu camiño cara á transición enerxética”. 

Acerca de Norvento 

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva décadas operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. Con presenza en diversos mercados internacionais, Norvento conta hoxe con máis de 250 MW de plantas de xeración renovable en explotación, máis de 750 MW desenvolvidos e máis de 1.000 MW en desenvolvemento, tanto en España como noutros mercados.