A EMPRESA ESPAÑOLA NORVENTO CONTINÚA O SEU AVANCE INTERNACIONAL NO AUTOCONSUMO INDUSTRIAL COA INSTALACIÓN DE DOUS NOVOS AEROXERADORES NO REINO UNIDO

• As dúas novas turbinas instaláronse en Kellybank Holiday Park, unha instalación destinada ao turismo rural en Ayrshire, Escocia, propiedade de The Small Wind-Co-Op, unha cooperativa enerxética financiada a través de crowdfunding.

• Norvento está presente no Reino Unido desde 2014, onde xa instalou máis de 25 aeroxeradores. 

• O aeroxerador nED100 foi deseñado por Norvento especificamente para o autoconsumo industrial de potencia media.

Madrid, 27 de abril de 2017.- Norvento, compañía española de tecnoloxías renovables con capacidade de actuación integral, instalou dous novos aeroxeradores nED100 en Escocia (Reino Unido) para autoconsumo industrial. A empresa española ten unha base estable no Reino Unido desde 2014, onde ampliou o seu negocio de autoconsumo industrial e onde xa instalou 25 turbinas.

Os dous novos aeroxeradores instaláronse no Kellybank Holiday Park, unha zona de lecer rural do condado de Ayrshire, en Escocia. As dúas turbinas están operativas desde finais de marzo e son propiedade de The Small Wind-Co-op, unha cooperativa enerxética formada por pequenos consumidores que se financia mediante crowdfunding. Calcúlase que cada un destes aeroxeradores producirá 320 MWh ao ano durante polo menos o próximos vinte anos de vida útil dos equipos. 

As máquinas instaladas son os aeroxeradores nED100, deseñados e desenvolvidos integramente por Norvento. Cunha altura de 24 metros e un diámetro de rotor de 22 metros, estas turbinas foron deseñadas especificamente para un consumo de potencia medio e están concibidas para unha captación aerodinámica máxima, o que fai delas un instrumento ideal para granxas, instalacións portuarias ou complexos hostaleiros e de lecer.

O nED100 é a tecnoloxía coa que Norvento pretende introducirse no gran mercado mundial do consumo enerxético medio (industria), propicio ao autoconsumo. Alcanza unha produción enerxética anual de entre 200 e 400 MWh en función das condicións do vento, e pode controlarse as 24 horas do día, os 365 días do ano, a través dunha aplicación para smartphone que inclúe todos os datos en tempo real. Ademais, poden utilizarse tanto en instalacións illadas (desconectadas da rede) como conectadas á rede. 

Segundo Manuel Pinilla, director comercial de Norvento, “queremos aproveitar un escenario regulamentario favorable ao autoconsumo industrial como o que ofrece o Reino Unido para seguir crecendo alí. A nosa tecnoloxía está preparada para ser comercializada en máis países, entre eles España, en canto o marco regulamentario sexa máis favorable ao autoconsumo”.

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Con presenza activa en cinco mercados internacionais (Reino Unido, Brasil, Estados Unidos, Polonia e Italia), Norvento conta hoxe 110 MW en operación en España e un pipeline de 597 MW en diferentes fases de desenvolvemento.