Norvento achega a eficiencia e o aforro enerxético a 2.000 alumnos galegos

• A través dunha formación impartida durante o primeiro trimestre do curso pola acción social que pon en marcha cada ano xunto a Sotavento.

• O obxectivo desta iniciativa foi concienciar a nenos e mozos da realidade enerxética na que vivimos, os retos que supón xerar a enerxía que consumimos e o impacto que isto ten sobre o medio.

• Esta edición tivo unha gran acollida entre o alumnado e docentes, especialmente nalgunhas localidades ás que a iniciativa chegou por rimeira vez, como Barro (Pontevedra).

Norvento Enerxía puxo en marcha un ano máis a acción social que realiza xunto a Sotavento, a cal buscou concienciar a 2.000 escolares galegos da realidade enerxética da sociedade na que vivimos.

A través dunha serie de accións que consistiron en visitar máis de 20 centros escolares de varias provincias galegas durante o primeiro trimestre do presente curso e de que centos de alumnos coñezan o parque experimental de Sotavento en Xermade (Lugo), Norvento e Sotavento abordaron xunto a nenos e mozos de entre 11 e 16 anos diversas realidades como o funcionamento do noso sistema eléctrico, ou a variedade de fontes de enerxía que o alimentan.

En liña co obxectivo de Norento de achegar coñecemento sobre as enerxías renovables á sociedade, a empresa fomentou esta actividade divulgativa co fin de propiciar a creación entre os escolares dunha opinión crítica e formada acerca da nosa realidade como conxunto, caracterizada por un excesivo consumo e dependencia dos combustibles fósiles e uns cada vez máis preocupantes problemas ambientais derivados das transformacións enerxéticas.

Mediante material dinámico e accesible para os máis novos, como infografías, calculadoras enerxéticas ou esquemas apoiados por talleres con instalacións enerxéticas a escala real, un equipo multidisciplinar de educadores de Sotavento con formación específica en enxeñería e pedagoxía adaptados aos coñecementos previos do alumnado impartiron estas formacións.

Gran acollida e chegada a novas localidades

Trátase do terceiro ano consecutivo que Norvento pon en marcha esta acción social dirixida principalmente aos centros educativos dos municipios onde realiza a súa actividade, acumulando máis de 5.000 alumnos formados en hábitos de aforro, eficiencia enerxética e respecto ao medio ambiente.

Esta última edición, cultivou unha gran acollida entre o alumnado e o profesorado asistente, un aspecto que se fai patente nos centos de valoracións positivas que recibiu a actividade. Destaca moi especialmente o caso do IES de Barro (Pontevedra), onde a acción social recalou por primeira vez este ano, e no cal a actividade tivo un gran recibimento, coa visita dos alumnos de 4º de ESO ás instalacións de Sotavento, e a de os formadores á clase dos máis pequenos do centro.