Norvento considera a derrogación do imposto ao sol un paso clave cara á modernización do sistema enerxético

Madrid, 5 de outubro de 2018.-  Norvento, empresa española de tecnoloxías renovables altamente especializada en autoconsumo industrial e xeración distribuída, considera a decisión adoptada hoxe polo Consello de Ministros de derrogar a peaxe de apoio ao autoconsumo, máis coñecido como imposto ao sol, un paso clave no avance cara a un sistema enerxético moito máis moderno e competitivo, e ao tempo un activador do papel das renovables na modernización da nosa economía e na loita contra o cambio climático. 

O dereito a autoconsumir, tanto a nivel individual como de forma compartida, e a expansión da xeración distribuída con tecnoloxías renovables cambiará a maneira en que entendemos o uso da enerxía e o seu papel na industria e no conxunto da sociedade. Ademais dunha modernización do sistema, a xeración distribuída ten un gran potencial como dinamizadora da economía española propiciando a aparición de novos sectores auxiliares, novos modelos de negocio e xerando emprego. 

Manuel Pinilla, Director Comercial de Norvento e Doutor en Enxeñería Eléctrica, afirma: “acollemos con satisfacción esta decisión, pois supón eliminar unha importante barreira non só para o noso negocio en fotovoltaica, senón para o resto de tecnoloxías renovables coas que traballamos, especialmente a eólica e biogás, que tamén está a xogar un papel cada vez máis importante para o autoconsumo industrial”. 

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Cunha presenza activa en cinco mercados internacionais (Reino Unido, Brasil, Estados Unidos, Polonia e Italia), Norvento conta actualmente con 120 MW en funcionamento en España e un pipeline de máis de 540MW en diferentes fases de desenvolvemento.