La Xunta e Norvento poñen en marcha o primeiro parque eólico experimental en España para autoconsumo industrial

• Este parque situarase no municipio lucense da Pastoriza e terá unha potencia total instalada de 2 MW, con cinco aeroxeradores nED, desenvoltos por Norvento, así como ata tres torres meteorolóxicas.

• Cun orzamento de máis de 2,5 millóns de euros, e un prazo de execución de 2 anos desde o inicio da construción, este centro de ensaios dedicarase á proba e demostración de tecnoloxía eólica de media potencia (100 kW – 700 kW).

• O acordo foi asinado esta mañá entre o conselleiro de Economía, Emprego e Industria, Francisco Conde, e o presidente e CEO de Norvento, Pablo Fernández.

A Consellería de Economía, Emprego e Industria e Norvento, compañía española de tecnoloxías renovables, anunciaron esta mañá un acordo para desenvolver o parque eólico experimental nED. Será o primeiro centro de España en probar aeroxeradores específicos de media potencia para autoconsumo industrial. 

Este parque eólico situado no municipio lucense da Pastoriza permitirá realizar ensaios e probas con ata cinco aeroxeradores de media potencia (entre 100 kW e 700 kW) para unha potencia total instalada de 2 MW. 

Cun investimento total de máis de 2,5 millóns de euros, o proxecto realizarase en dúas fases e espérase que estea totalmente construído nun prazo de 24 meses desde o inicio das obras. Ademais, o centro de probas contará con ata tres torres meteorolóxicas e con instalacións e equipos de última xeración que permitirán probar novos modelos de aeroxeradores no futuro. 

As máquinas que se instalarán no parque serán os aeroxeradores nED100, deseñados e desenvolvidos integramente por Norvento. Cunha altura de 22 metros e pas de 36 metros, estas turbinas foron deseñadas especificamente para consumos medios e están pensadas para o seu uso en sistemas de xeración distribuída (autoconsumo). Durante os 6 anos de desenvolvemento desta tecnoloxía, Norvento exportou máis de 25 unidades ao Reino Unido, onde xa se están utilizando en granxas e en zonas portuarias.

A Xunta de Galicia considera que as condicións climáticas de Galicia son especialmente favorables para a tecnoloxía eólica de media potencia. Por iso, esforzouse en promover e impulsar o seu desenvolvemento co obxectivo de achegar solucións enerxéticas eficientes e sostibles dirixidas a mellorar a competitividade e aumentar a autonomía enerxética do sector industrial galego.

De feito, o desenvolvemento deste parque eólico foi posible grazas á existencia dunha normativa específica de referencia en Galicia, sacada adiante en 2011 pola Xunta coa publicación do Decreto autonómico 30/2011. Este decreto regula o procedemento para a autorización de parques eólicos experimentais cun alto compoñente de I+D+i na Comunidade Autónoma de Galicia. Tamén permite considerar as particularidades deste tipo de instalacións experimentais para a súa autorización e desenvolvemento. 

A firma do acordo completouse esta mañá entre o conselleiro de Economía, Emprego e Industria, Francisco Conde e o presidente e conselleiro delegado de Norvento, Pablo Fernández na área de Goberno do Parlamento de Galicia.

Pola súa banda, Pablo Fernández Castro, presidente e CEO de Norvento, felicitou a Xunta pola posta en marcha deste proxecto pioneiro en España. “Esperamos que a comunidade industrial galega poida beneficiarse pronto do gran potencial que ofrecen as tecnoloxías renovables para a xeración distribuída de enerxía e o autoconsumo”.