NORVENTO NA FEIRA GALEGA DA ENERXÍA DE 2018 

Norvento participará na II Feira da Enerxía de Galicia 2018, que terá lugar do 22 ao 24 de marzo na Feira Internacional de Galicia en Silleda, Pontevedra. Cun stand de 70 m², no que os visitantes poderán coñecer de primeira man o amplo abano de solucións tecnolóxicas multirrenovables que Norvento achega ao tecido empresarial.

Lugo, 19 de marzo de 2018.- Norvento, empresa española de tecnoloxías renovables con capacidade de actuación integral e máis de 35 anos de experiencia no sector, dará a coñecer as súas últimas novidades tecnolóxicas no campo da xeración distribuída e os sistemas avanzados de xestión enerxética (microrredes) na segunda edición da Feira Galega da Enerxía. 

A empresa lucense desenvolveu unha carteira de produtos e solucións que responden á crecente demanda de solucións de autoconsumo no sector privado. Estas solucións e produtos adáptanse ás necesidades específicas de cada sector de actividade.

Un exemplo son as plantas de gas Bioplant, destinadas ao sector agrícola-gandeiro e industrial, que permiten aproveitar residuos ou subprodutos con alto contido en materia orgánica para xerar enerxía de forma sostible e rendible.

Para as pequenas e medianas empresas doutros sectores industriais ou de servizos que se estén barallando a idea de xerar a súa propia enerxía de autoconsumo, Norvento ofrece solucións baseadas no aeroxerador nED100, así como na enerxía solar fotovoltaica.

Pero ademais das solucións técnicas, Norvento acompaña ao cliente en todas as fases do proxecto, ofrecéndolle asesoramento e apoio constante: desde o estudo de viabilidade, buscando a alternativa máis vantaxosa, ata a posta en marcha do proxecto.

Os visitantes da Feira da Enerxía de Galicia 2018 tamén terán a oportunidade de familiarizarse coas innovacións tecnolóxicas en materia de eficiencia e xestión enerxética implantadas na nova sede corporativa de Norvento en Lugo, un edificio é 100% autosuficiente en enerxía renovable xerada in situ e desconectada das redes eléctrica e de gas. Cunha cualificación BREEAM de excepcional, a nova sede de Norvento é un referente nacional no campo da edificación sostible, cunha demanda de enerxía primaria (electricidade e calor) de ao redor do 34% da dun edificio convencional. 

Isto é posible grazas a unha microrrede que xestiona de forma eficaz a xeración distribuída, o almacenamento e as cargas (eléctricas e térmicas) do edificio. Todo iso completamente illado das redes de distribución de enerxía. A microrrede inclúe múltiples tecnoloxías de xeración renovable como a solar, a eólica e a xeotérmica, así como elementos de almacenamento e regulación (baterías, depósitos de inercia). 

Con varios estudos de viabilidade de microrredes en marcha con empresas do sector empresarial galego, Norvento confía en que se materialicen novos proxectos deste tipo no próximo ano. Trátase dunha alternativa cada vez máis competitiva que garante a fiabilidade da subministración e protexe fronte á volatilidade e as subidas do prezo da enerxía.

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Cunha presenza activa en cinco mercados internacionais (Reino Unido, Brasil, Estados Unidos, Polonia e Italia), Norvento conta actualmente con 114 MW en funcionamento en España e unha carteira de máis de 650MW en diferentes fases de desenvolvemento.