Norvento Enerxía abastecerá con enerxía 100% renovable á illa portuguesa de Corvo

• O proxecto, desenvolto para a enerxética EDA Renováveis pola compañía galega, permitirá cubrir parte da demanda eléctrica da máis setentrional das Azores con fontes verdes.
• Norvento instalará en Corvo sete aeroxeradores de media potencia nED100 e o Sistema SCADA de Monitorización e control de todos os compoñentes do parque eólico.
• A implantación da tecnoloxía de Norvento permitirá mellorar a calidade da subministración elétrica aos 400 habitantes da illa, ata o de agora totalmente dependentes dos combustibles fósiles.

Norvento Enerxía, empresa xeradora de enerxía renovable, tecnoloxía asociada a productos, e solución avanzadas para enerxía distribuída, iniciou a execución dun proxecto na illa portuguesa de Corvo (Azores), mediante o cal será capaz de cubrir parte da demanda de enerxía eléctrica deste territorio a partir de fontes renovables.

O proxecto, desenvolto por Norvento para a enerxética portuguesa EDA Renováveis, executarase baixo a modalidade de chave en man ou EPC, e consistirá en despregar na illa sete aeroxeradores de media potencia nED100 fabricados na súa planta de Vilalba (Lugo), ademais do Sistema SCADA deseñado pola compañía galega.

Esta tecnoloxía permitirá a monitorización e control do estado de todos os componentes do parque eólico, á vez que empregará un protocolo de comunicación compatible e integrable co sistema desenvolto por EDA Renováveis.

Independencia enerxética renovable nas Azores

A posta en marcha deste proxecto supoñerá una mellora na calidade da subministración eléctrica aos preto de 400 habitantes da illa, así como dos centos de turistas que a visitan cada ano, permitíndolles autoabastecerse enerxéticamente a través de fontes renovables e minimizar o risco de apagamentos.

Ata o momento, esta insua dependía en exclusiva do uso de combustibles fósiles chegados por mar para obter enerxía. Neste sentido, os aeroxeradores de media potencia nED100 de Norvento, deseñados e fabricados na factoría lucense da compañía, contribuirán a reducir os custos de produción da enerxía que consumen os habitantes da illa de Corvo e permitiranlles acceder a unha fonte de abastecemento limpa e fiable.

A tecnoloxía eólica despregada por Norvento garante asimesmo a subministración en zonas con condicións meteorolóxicas e orografía complexas como a de Corvo. Cunha superficie de 17,13 km², de 6,5 km de longo por 4 km de ancho, trátase dun terreo de difícil acceso pola súa ubicación xeográfica, xa que xunto á illa de Flores é a mais occidental do arquipélago das Azores e, polo tanto, un dos últimos pontos de Europa polo oeste.

Un reto en termos de loxística e construción

Este proxecto supón un desafio loxístico e de obra civil para Norvento, debido á complexa orografía de Corvo, á súa climatoloxía cambiante e á limitada existencia de materiais de construción na illa. Isto obriga á compañía a transportar dende a península os inertes e a maquinaria para levar a cabo o proxecto, ademais dos medios de transporte e elevación, sistemas eléctricos e outros elementos necesarios para executar a obra.

Igualmente, e debido ás limitacións existentes na terminal loxística da illa, que ven reducida a capacidade de toneladas contenerizadas que poden absorber, faise necesaria a posta en marcha dunha serie de solucións loxísticas de gran calado que inclúen o transporte  por mar dos nED100 dende o Porto de Lisboa, e o seu posterior traslado noutro barco, a Corvo. Dende aí, partirán en camións cara á súa ubicación definitiva, nunha manobra que debe aproveitar os meses estivais para reducir o impacto do clima sobre as labores de montaxe. ‘Dende Norvento, estamos moi satisfeitos de que EDA Renováveis confiara en nós para mellorar na subministración eléctrica renovable á Illa de Corvo. Nosa experiencia en proxectos de enerxía distribuída e microrredes permitiunos despregar esta infraestrutura, que dotará aos habitantes de Corvo da capacidade de autoabastecerse con recursos renovables. Este proxecto visibiliza as oportunidades que ofrecen as tecnoloxías renovables para reducir a dependencia dos combustibles fósiles en sistemas eléctricos pequenos e impulsar o seu desenvolvemento enerxético, así como á súa descarbonización’, sinala Juan Morilla, director do Área de Operacións de Norvento Enerxía.