Norvento Enerxía comeza o traslado dos seus aeroxeradores nED100 cara a illa portuguesa de Corvo

• Dende a pasada semana, os produtos tecnolóxicos da empresa empezaron a saír desde a súa fábrica de Vilalba ata o Porto de Leixões (Matosinhos), desde onde partirán en barco cara as Azores.

• Este proxecto, realizado para a enerxética portuguesa EDA Renováveis, permitirá cubrir parte da demanda eléctrica da illa máis setentrional do arquipélago con enerxía eólica renovable.

• Esta iniciativa logrará mellorar a calidade da subministración eléctrica aos 400 habitantes da illa e aos centos de turistas que a visitan cada ano.

Norvento Enerxía, líder en enerxía renovable e tecnoloxía asociada, celebra un novo fito na transición cara a un futuro sostible co inicio do seu ambicioso proxecto eólico na illa de Corvo (Azores, Portugal) para a enerxética EDA Renováveis. A compañía galega iniciou a pasada semana o traslado cara a illa portuguesa dos seus sete aeroxeradores nED100 dende a súa fábrica en Vilalba (Lugo), ata o Porto de Leixões (Matosinhos, Portugal), desde onde partirán cara as Azores, nunha viaxe que supón un mes de tránsito por mar.

Este proxecto, cuxo groso de montaxe se levará a cabo durante o mes de xullo, representa un paso significativo cara á independencia enerxética e a aposta polas enerxías verdes dun territorio como o da illa de Corvo, caracterizado polo seu difícil acceso e complexa orografía. Este emprazamento constitúe un dos puntos máis remotos de Europa cara ao oeste.

Un desafío loxístico

A loxística para transportar todos os compoñentes deste parque eólico supón todo un desafío. O traslado dos aeroxeradores nED100 de media potencia (100 kW) de Norvento Enerxía, deseñados e fabricados en España, requiriu dunha coidadosa planificación previa coas partes implicadas de ambos os países.

O proxecto, que puxo en marcha por Norvento Enerxía baixo a modalidade de chave en man ou EPC, permitirá instalar unha potencia eólica total na illa de 700kW. Para iso, a compañía galega empregará estes sete aeroxeradores de media potencia, ademais do seu Sistema SCADA para a Monitorización e Control de todos os compoñentes do parque eólico.

Transición cara as renovables

Para os preto de 400 habitantes de Corvo, este proxecto supón un momento de transición da dependencia exclusiva de combustibles fósiles chegados exclusivamente por mar á adopción dunha subministración eléctrica procedente de fontes renovables.

Ademais, a implementación desta infraestrutura eólica fortalecerá a resiliencia do sistema eléctrico da illa, mitigando o risco de apagamentos e brindando unha maior estabilidade e seguridade enerxética para todos os seus habitantes. Este avance non só marca un fito na historia de Corvo, senón que tamén establece un exemplo inspirador de como as comunidades poden adaptarse e prosperar en harmonía co medio ambiente, impulsando un futuro máis sostible e próspero para as xeracións vindeiras.

Renovables, tamén en zonas illadas

Este proxecto súmase á crecente lista de iniciativas de Norvento Enerxía en rexións illadas e de difícil acceso, onde a combinación de tecnoloxías renovables e sistemas de almacenamento enerxético está a impulsar a transición cara a un futuro máis sostible. Dende a empresa, destácase o compromiso co desenvolvemento enerxético destas comunidades, así como coa descarbonización dos seus sistemas eléctricos, demostrando o potencial das enerxías renovables para reducir a dependencia dos combustibles fósiles e promover a autosuficiencia enerxética en áreas remotas.

‘Estamos moi orgullosos de poder mellorar a vida das persoas coa nosa tecnoloxía. Este proxecto é sen dúbida ambicioso, pero cremos que tamén representa un paso cara a redución da dependencia de combustible fósil. A chegada das renovables a Corvo significa para nós un logro como profesionais. Estamos entusiasmados co proxecto’ sinala Juan Morilla, director da área de Operacións de Norvento Enerxía.

—

O contrato para a subministración e instalación de equipos para o Parque Eólico da Illa de Corvo inscríbese no ámbito do Sub-investimento C14-i03.02-RAA – Corvo Renovável do PRR – Plan de Recuperación e Resiliencia, co obxectivo de aumentar a capacidade instalada de enerxía renovable, co obxectivo de producir 700 kW de enerxía eólica na Illa de Corvo.