Norvento Enerxía investirá máis de cincuenta
millóns de euros nunha nova fábrica
autosuficiente e cero emisións en Lugo

• A planta situarase xunto ao edificio CIne, sede da compañía no Parque Empresarial As Gándaras en Lugo, e supoñerá a consolidación de 1.000 postos de traballo.
• Esta nova instalación, denominada “Fábrica Norvento Enerxía Cero”, foi declarada Proxecto Empresarial Singular pola Xunta de Galicia e será completamente autosuficiente enerxéticamente a partir de fontes 100% renovables.
• Producirá toda unha gama de produtos tecnolóxicos de alto valor engadido para a xeración e o almacenamento enerxético deseñados por Norvento, entre os que se inclúen os aeroxeradores nED de media potencia, solucións de almacenamento eléctrico con baterías e sistemas de electrónica de potencia que permitirán producir hidróxeno verde.

Norvento Enerxía, empresa xeradora de enerxía renovable e tecnoloxía asociada a produtos e solucións para enerxía distribuída, construirá un novo centro de produción cero emisións e autosuficiente enerxéticamente nas proximidades da súa sede CIne —Centro de Innovación Norvento Enerxía—, no Parque Empresarial As Gándaras, en Lugo. Este innovador proxecto, denominado “Fábrica Norvento Enerxía Cero”, supoñerá un investimento de máis de cincuenta millóns de euros e a consolidación de 1.000 postos de traballo directos, indirectos e inducidos.

Esta iniciativa, que supón unha nova aposta de Norvento pola comunidade galega, foi declarada pola Xunta de Galicia como Proxecto Empresarial Singular, e responde o obxectivo da compañía de impulsar a independencia tecnolóxica de España no ámbito das enerxías renovables. Ademais, o proxecto está centrado en desenvolver solucións tecnolóxicas sostibles principalmente nun sector que conta con gran potencial de futuro, o do almacenamento enerxético.

A nova “Fábrica Norvento Enerxía Cero”, cuxo inicio da fase de construción espérase para o segundo semestre de 2024, ocupará unha superficie estimada aproximada de 40.000 metros cadrados de chan industrial nunha primeira fase, e destinarase á produción de toda unha gama de produtos de alto valor engadido deseñados por Norvento, tales como os aeroxeradores de media potencia nED, solucións contenerizadas de almacenamento eléctrico con baterías e sistemas de electrónica de potencia que permitirán aos electrolizadores a produción de hidróxeno verde, entre outras innovadoras solucións enfocadas a impulsar a independencia tecnolóxica.

Fábrica neutra en carbono

Como o seu propio nome indica, o novo centro de produción de Norvento contará cunha tecnoloxía que lle permitirá ser completamente independente enerxéticamente a partir de fontes 100% renovables, para converterse así nunha das primeiras fábricas completamente autosuficientes. Así mesmo, e derivado desta subministración renovable, o novo centro terá un balance de cero emisións netas de carbono, o que a converterá tamén en pioneira no ámbito da descarbonización industrial.

Esta neutralidade en carbono responde á visión que Norvento vén poñendo en práctica nas súas máis de 40 anos de traxectoria como pioneira no desenvolvemento de enerxías renovables, e reflectida tamén na súa sede corporativa CIne. Neste centro, a compañía conta cun sistema propio que garante a independencia absoluta da rede eléctrica, xa que aproveita a luz do sol, o vento, a auga da choiva e recicla as augas grises. Grazas á súa capacidade integral de incorporar enerxías renovables, esta sede evita a emisión á atmosfera de máis de 160 toneladas anuais de gases de efecto invernadoiro.

Para Pablo Fernández Castro, presidente de Norvento Enerxía, “este proxecto industrial demostra, unha vez máis, o forte compromiso de Norvento con Galicia e o seu talento, así como o gran potencial que ten a nosa terra para contribuír á diminución da dependencia tecnolóxica no sector das enerxías renovables. A nova fábrica consolida o noso proxecto tecnolóxico e industrial e permitiranos avanzar no desenvolvemento de novas solucións disruptivas para a xeración e almacenamento de enerxía, así como impulsar a fabricación española de tecnoloxías que nos permitan producir e xestionar enerxía limpa e eficiente para poder así liderar a transición enerxética”.