Norvento Enerxía triplicou a súa potencia de autoconsumo instalado en 2022

• A compañía pechou o ano 2022 con máis de 5,5 MW de potencia en proxectos de autoconsumo fotovoltaico e 10 MWh en proxectos de almacenamento instalados.

Norvento Enerxía comunicou que o pasado ano 2022 viu triplicada a súa potencia en autoconsumo instalado con respecto ao ano anterior, alcanzando os 5,5 MW de proxectos de autoconsumo fotovoltaico e os 10 MWh en proxectos de almacenamento. Estas cifras fanse posibles grazas á implementación tanto de proxectos chave en man de autoconsumo dirixido a empresas industriais, como a zonas e negocios rurais con pouca dispoñibilidade de potencia eléctrica. Estes datos afianzan o compromiso da compañía por ofrecer ao mercado soluciones integrais e avanzadas para o autoconsumo.

Entre os proxectos postos en marcha atópase o desenvolvido para a empresa líder a nivel mundial en extrusión de aluminio, Extrugasa. Norvento Enerxía despregou unha instalación de autoconsumo fotovoltaico de 2,2 MWp de potencia, converténdose na maior de Galicia e unha das máis grandes de todo o país. O proxecto púxose en marcha nunha zona estratéxica para o sector do aluminio, xa que nas súas inmediacións transfórmase aproximadamente o 60% deste material en España.

Outro dos proxectos destacados é o posto en marcha para a industria vidreira, en concreto para un dos principais produtores de vidro europeos, Vidrala, co que Norvento asinou o pasado ano un acordo para acelerar o seu plan de descarbonización. Como parte desta alianza, a compañía desenvolveu e levou a cabo a dirección do proxecto de 12 MWp de autoconsumo na planta que a compañía vidreira posúe en Caudete.

Así mesmo, Norvento está involucrado en diferentes proxectos de autoconsumo para compañías pertencentes á industria láctea, cárnica, ao sector madeireiro e mineiro, entre outros. Boa parte dos devanditos despregamentos contaron con sistemas de almacenamento enerxético mediante tecnoloxía propia desenvolvida e fabricada por Norvento Enerxía.

Autoconsumo en zonas rurais e de difícil acceso

Máis aló dos acordos dirixidos ao autoconsumo industrial, Norvento Enerxía puxo en marcha tamén proxectos dirixidos a negocios rurais. Por exemplo, un deles implicou a instalación dunha fotovoltaica con tecnoloxías de almacenamento -deseñadas e fabricadas na súa totalidade pola empresa española en España- en granxas de vacún. Estas tecnoloxías renovables permitiron proporcionar unha potencia extra dirixida aos picos de muxido, usando a enerxía almacenada co excedente fotovoltaico e a carga nocturna.

Así mesmo, o Grupo construíu un proxecto enerxético nunha das primeiras comunidades locais de autoconsumo enerxético colectivo en funcionamento en España. Trátase dunha comunidade de enerxía capaz de funcionar totalmente desconectada da rede eléctrica e de abastecer de enerxía a todos os veciños da localidade, mediante unha instalación fotovoltaica e cun sistema de almacenamento con capacidade de 242 kWh.

Primeiro Parque Experimental para autoconsumo industrial en España

A compañía inaugurou a finais do ano pasado o primeiro Parque Experimental para autoconsumo industrial en España, situado no Concello da Pastoriza, na provincia de Lugo. Esta instalación foi deseñada como plataforma de ensaio das diferentes tecnoloxías de xeración e almacenamento enerxético renovable da compañía.

‘Desde Norvento Enerxía seguimos crecendo e sumando proxectos de autoconsumo cada ano. Este tipo de proxectos favorecen a redución da dependencia enerxética, facilitando así un maior control sobre os custos derivados desta actividade. No caso das empresas industriais supón un aforro significativo e unha mellora da competitividade a medio e longo prazo. Como expertos en tecnoloxías renovables, axudamos aos nosos clientes para satisfacer as súas necesidades de autoconsumo, desde a xeración renovable ata a tecnoloxía de almacenamento” – asegura Luis Jiménez, Responsable de Almacenamento e Fotovoltaica de Norvento Enerxía.