NORVENTO AMPLIARÁ O SEU NEGOCIO DE AUTOCONSUMO CON ENERXÍAS RENOVABLES AO SECTOR HOSTALEIRO

• A empresa céntrase no sector hostaleiro para ampliar e promover o autoconsumo nunha industria na que a enerxía pode supoñer ata o 25% dos gastos de funcionamento dun establecemento. 

• O aeroxerador nED 100, desenvolvido por Norvento, está especificamente deseñado para o autoconsumo industrial de potencia media, e adáptase a complexos turísticos ou grandes complexos hostaleiros polo seu baixo impacto ambiental e o seu alto rendemento.

Madrid, 9 de maio de 2017.- Norvento, compañía española de tecnoloxías renovables con capacidade de actuación integral, iniciou o seu plan de expansión no sector hostaleiro, centrándose na xeración distribuída e o autoconsumo de enerxía media.

O sector hostaleiro é un dos de maior crecemento no mundo, cunha cifra estimada de 1.200 millóns de persoas que viaxan ao estranxeiro cada ano, segundo a Organización Mundial do Turismo (OMT). Este crecemento representa un reto importante para este sector en termos de enerxía, xa que o aumento de turistas leva asociado un incremento da demanda de recursos enerxéticos e, por tanto, un aumento do gasto. Tamén hai que ter en conta que a partida de enerxía adoita ser a máis elevada despois dos gastos de persoal. Segundo datos da consultora PwC, os custos enerxéticos poden supoñer entre o 4% e o 25% dos gastos de explotación dun establecemento hostaleiro. 

Para dar resposta a estas novas necesidades do sector, Norvento iniciou un plan de expansión para promover a instalación de sistemas de autoconsumo enerxético en hoteis, resorts e complexos hostaleiros. O autoconsumo, ou xeración distribuída, baséase na xeración sostible de electricidade no punto de consumo. Norvento resólveo mediante a instalación de tecnoloxías renovables como a eólica, a solar fotovoltaica ou diferentes bioenerxías. A instalación deste tipo de sistemas permite reducir tanto a pegada de carbono como os custos asociados á enerxía. 

Ademais, a incorporación de medidas que fomenten a eficiencia enerxética pode supoñer un importante aforro para o sector, pero non é o único beneficio. De feito, durante o ano 2017 celébrase o Ano Internacional do Turismo Sostible para o Desenvolvemento, un evento promovido pola OMT para concienciar sobre os beneficios de promover un turismo máis sostible: máis emprego, inclusión social e redución da pobreza, uso eficiente dos recursos e protección do medio ambiente, entre outros.

Para despregar a súa actividade neste sector, Norvento prioriza rexións como as Baleares, as Canarias ou a Costa do Sol. Trátase de rexións nas que a densidade do sector turístico é alta, hai complexos turísticos con espazo dispoñible e as condicións de sol e vento son excelentes. Manuel Pinilla, director comercial de Norvento, explica que “ao incorporar a xeración renovable, o sector hostaleiro ten a oportunidade de mellorar os seus resultados e tamén de mostrar a súa contribución ao cambio de modelo enerxético reducindo o seu impacto ambiental.”

O aeroxerador nED100, unha solución para complexos hostaleiros

Un dos produtos deseñados por Norvento para a xeración distribuída de consumo de potencia media é o aeroxerador nED100. Esta turbina é ideal para complexos turísticos ou grandes complexos hostaleiros fóra dos núcleos urbanos, xa que é de menor tamaño que os aeroxeradores convencionais, polo que non require dun gran espazo de instalación e ten un impacto visual reducido. A turbina tamén é silenciosa e, grazas ao seu coidado deseño e á súa eficiencia mecánica e eléctrica, reduce as súas necesidades de mantemento a unha soa visita ao ano.

Ademais, pode ser controlada durante as 24 horas do día, os 365 días do ano, polo centro de control de Norvento, polo que o cliente pode despreocuparse dos requisitos técnicos dos equipos. 

Estes aeroxeradores xa funcionaron con éxito noutros países como o Reino Unido, onde Norvento instalou unhas 25 unidades, principalmente en cooperativas gandeiras e instalacións portuarias. A súa experiencia nesta contorna foi moi positiva e as expectativas son de crecemento, xa que a empresa prevé instalar 500 unidades nos próximos 10 anos.

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Con presenza activa en cinco mercados internacionais (Reino Unido, Brasil, Estados Unidos, Polonia e Italia), Norvento conta hoxe 110 MW en operación en España e un pipeline de 597 MW en diferentes fases de desenvolvemento.