Norvento propón medidas adicionais para favorecer o desenvolvemento do autoconsumo fotovoltaico industrial

• O goberno publicou a semana pasada o borrador de Real Decreto que desenvolverá a normativa para o autoconsumo no noso país. 

• O texto supón un importante avance para o desenvolvemento do autoconsumo fotovoltaico en España. 

• O consumo de electricidade a cargo da industria supón un 42% do total a nivel xeral, sendo clave a contribución desta á transición enerxética.

Madrid, 5 de febreiro de 2019.- Norvento, compañía española de tecnoloxías renovables con alta especialización en autoconsumo industrial e xeración distribuída, valorou de forma positiva a proposta de Real Decreto pola que se regularán as condicións administrativas, técnicas e económicas do autoconsumo, aínda que propón algunhas medidas adicionais que dinamicen a adopción deste tipo de instalacións no ámbito residencial e especialmente, no industrial. 

A norma, que desenvolverá regulamentariamente o Real Decreto-lei 15/2018, foi publicada o pasado día 29 de xaneiro polo Ministerio de Transición Ecolóxica, e estará aberta a alegacións ata o 8 de febreiro. Norvento recoñece que o borrador recolle medidas reclamadas polo sector renovable que suporán un avance positivo para o autoconsumo. No caso de que se confirme esta normativa, simplificaríanse os procesos administrativos e de conexión, quedarían especificados os mecanismos de compensación de excedentes, e ampliaríanse as modalidades existentes de autoconsumo. Deste xeito, faríase efectiva a posibilidade de desenvolver instalacións de autoconsumo tanto individuais como colectivas. 

Con todo, aínda que o texto establece a compensación de excedentes, isto só é aplicable en instalacións de menos de 100kW. O devandito límite supón un atranco para instalacións de autoconsumo no sector industrial, que sufrirán unha maior carga administrativa se desexan monetizar os excedentes. O sector industrial supón ao redor do 42% do consumo de electricidade (segundo datos da Axencia Internacional da Enerxía). Polo tanto, facilitar a este sector a adopción de sistemas de xeración para autoconsumo será clave para a transición enerxética. 

De forma concreta e co obxecto de sacar o máximo partido ao borrador de desenvolvemento regulamentario do autoconsumo, Norvento propón as seguintes modificacións ao borrador do Real Decreto-lei:

• Ampliación do sistema simplificado de compensación a instalacións maiores de 100kW: Este límite supón un atranco para instalacións de autoconsumo no sector industrial, que en caso de querer monetizar os seus excedentes veríase suxeito a unha maior carga administrativa. Non existen motivos obxectivos que apoien a limitación da facturación neta a instalacións de ata 100kW, e de feito na actualidade hai países como Brasil que incrementaron en 2017 o límite do seu programa de balance neto a instalacións de ata 5MW. 

• Garantía dun procedemento de consulta e solicitude de punto de conexión sinxelo que fomente a adscrición da industria á modalidade de autoconsumo con excedentes: Coa proposta actual todo aquel con unha instalación de máis de 15kW que desexe inxectar excedentes á rede ten que solicitar un punto de conexión, un trámite que implica certas complicacións. Este modelo fomentará que os autoconsumidores se decanten pola inclusión dun sistema antivertido e renuncien á inxección dos potenciais excedentes á rede, na busca dunha tramitación máis rápida e sinxela dos seus proxectos. Para a sociedade isto supón a renuncia a produción renovable existente, que deixará polo tanto de contribuír aos obxectivos de redución de emisións. 

• Ampliación do prazo de compensación simplificada de enerxía: O borrador marca o prazo dun mes para esta compensación. Co obxectivo de dar maior flexibilidade a negocios con carga cíclica ou estacional e fomentar a adopción por parte destes de xeración renovable, Norvento propón ampliar este prazo a un período de 3 meses.

Luis Jiménez Gutiérrez, responsable da Unidade de Negocio Solar Fotovoltaica de Norvento, sinalou que “para aproveitar todo o potencial do autoconsumo industrial, a nova normativa debe facilitar aínda máis a creación de instalacións de máis de 100kW mediante a eliminación de límites por potencia á compensación de excedentes e garantindo a simplificación dos procedementos de conexión a rede”.

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Con presenza en cinco mercados internacionais (Reino Unido, Brasil, Estados Unidos, Polonia e Italia), Norvento conta hoxe cun total 750 MW en operación, construción e desenvolvemento, tanto en España como noutros mercados.