Norvento recibe o apoio do Fondo Europeo de Innovación para a súa fábrica autosuficiente e cero emisións neFO de Lugo

• O proxecto recibiu unha subvención de 27,5 millóns de euros da Comisión Europea.

• Trátase dun dos 77 proxectos que asinaron o Grant Agreement de 337 presentados, procedentes de 27 países. O único proxecto dunha empresa 100% española elixido na categoría de fabricación de compoñentes para as renovables con foco en almacenamento.

• neFO é un dos máis relevantes proxectos de Norvento, que busca desempeñar un papel fundamental no mercado dos produtos máis vangardistas para a xeración, xestión e almacenamento de enerxía.

• O programa Innovation Fund (IF) é unha das principais iniciativas de financiamento do mundo para o desenvolvemento de tecnoloxías innovadoras baixas en carbono.

Norvento resultou seleccionada para obter unha axuda do Fondo Europeo de Innovación para o seu proxecto de fábrica autosuficiente e neta en emisións -neFO-, que construirá no Parque Empresarial As Gándaras, en Lugo, preto da súa sede CIne.

O proxecto foi elixido para recibir unha subvención de 27,5 millóns de euros. Trátase dun dos 77 proxectos que asinaron o Grant Agreement coa Axencia Executiva Europea do Clima, Infraestruturas e Medio Ambiente (CINEA) dun total de 337 presentados, procedentes de 27 países. É o único proxecto dunha empresa 100% española, seleccionado na categoría de fabricación de compoñentes para enerxías renovables con foco en almacenamento.

Un centro de fabricación á vangarda en Europa

O proxecto de fábrica autosuficiente e neta en emisións, neFO, é unha ambiciosa iniciativa de Norvento que busca desempeñar un papel fundamental no mercado dos produtos para a xeración, xestión e almacenamento de enerxía, contando coas máis disruptivas tecnoloxías ao servizo da innovación.

Norvento construirá en Lugo unha fábrica de última xeración que fabricará aeroxeradores de vangarda, equipos de almacenamento de baterías avanzados e convertidores de enerxía modernos, todos deseñados para integrarse perfectamente nun sistema único e eficiente adaptado ás necesidades dos seus clientes. Ademais, o proxecto neFO evitará a emisión anual de 187.000 toneladas de CO2 a partir da súa entrada en operación, dado que se trata dunha fábrica neutra en emisións que xerará a súa propia enerxía e almacenaraa grazas aos propios sistemas tecnolóxicos alí fabricados.

En esencia, o proxecto neFO é a resposta de Norvento ás demandas do sector enerxético europeo para facer máis competitiva a enerxía renovable e garantir que a empresa siga á vangarda do avance tecnolóxico e a contribución á descarbonización.

Un dos maiores programas de financiamento para o desenvolvemento de tecnoloxías baixas en carbono

O Fondo Europeo de Innovación, ou Innovation Fund (IF), é unha das maiores iniciativas de financiamento a nivel mundial para o desenvolvemento de tecnoloxías baixas en carbono. O seu obxectivo é introducir no mercado solucións para descarbonizar a industria europea e apoiar a súa transición cara á neutralidade climática, fomentando ao mesmo tempo a súa competitividade.

“Este apoio supón para Norvento o poder facer realidade a nosa ambición de converter neFO nunha das fábricas máis eficientes e avanzadas de Europa para a fabricación de equipos tecnolóxicos de vangarda e innovadoras e completas solucións de enerxía”, sinala Pablo Fernández Castro, Presidente de Norvento.

Consulta o comunicado de prensa emitido pola Axencia Executiva Europea do Clima, Infraestruturas e Medio Ambiente (CINEA) para máis información acerca desta convocatoria do Fondo Europeo de Innovación: Innovation Fund: €4.2 billion to support 77 cutting-edge decarbonisation projects for EU’s clean energy transition – European Commission