Norvento volve levar ás aulas galegas as enerxías renovables e a eficiencia enerxética

• A través da súa xa consolidada acción social xunto ao Parque Eólico Experimental Sotavento.

• De novo, esta iniciativa buscou concienciar a case 2.000 alumnos de varias provincias de Galicia, da necesidade de apostar polas tecnoloxías limpas e a eficiencia enerxética para un mellor futuro.

• Esta edición da acción social foi a mellor valorada polo alumnado e profesores dende que comezase a desenvolverse en 2020, cun 100% de destinatarios que repetiría as actividades postas en marcha.

Norvento Enerxía puxo en marcha, un ano máis, a acción social que realiza xunto ao Parque Eólico Experimental de Sotavento, a cal busca concienciar a preto de 2.000 alumnos galegos cada ano, da importancia das enerxías renovables e a eficiencia enerxética para un mellor futuro. 

Nesta ocasión, os educadores de Sotavento visitaron, durante o primeiro cuadrimestre do curso académico, 17 centros escolares situados nas provincias de Lugo, A Coruña e Pontevedra, onde mostraron aos escolares galegos como funciona o sistema eléctrico, as diversas fontes de enerxía empregadas en España, as repercusións económicas e ambientais derivadas do seu uso, así como diferentes medidas de aforro e eficiencia enerxética aplicadas á vida cotiá. Ademais, tamén foron varios os centros que visitaron as instalacións do Parque Eólico Experimental de Sotavento, onde puideron experimentar a aprendizaxe destes coñecementos cun enfoque aínda máis práctico.

Na que xa é a cuarta edición desta acción social, Norvento e Sotavento abordaron, xunto a nenos e adolescentes de entre 3 e 17 anos, diversas realidades co obxectivo de achegar coñecemento sobre as enerxías renovables á sociedade. Mediante material dinámico e accesible para os máis novos, como infografías, calculadoras enerxéticas ou esquemas apoiados por talleres con instalacións enerxéticas a escala real, un equipo multidisciplinar de educadores de Sotavento con formación específica en enxeñería e pedagoxía adaptados aos coñecementos previos do alumnado impartiron estas formacións.

Norvento impulsou esta actividade divulgativa co fin de propiciar a creación entre os escolares dunha opinión formada acerca da realidade enerxética da sociedade e da necesidade de apostar por un modelo limpo e sostible nas próximas décadas.

A edición mellor valorada e presenza en tres provincias galegas

Norvento leva desenvolvendo ininterrompidamente desde 2020 esta iniciativa xunto a Sotavento, abarcando a un número cada vez maior de alumnos e tendo presenza en máis centros escolares. Dende entón, xa son case 7.000 os escolares formados en costumes de aforro, eficiencia enerxética e respecto ao medio ambiente.

Esta última edición foi a mellor valorada ata a data entre os alumnos e o profesorado asistente, xa que o 100% dos asistentes sinalou, nunha enquisa realizada tras o desenvolvemento das diferentes actividades enmarcadas na acción social, que sen dúbida as repetiría.

A acción social de Norvento e Sotavento chegou este ano, como novidade, a localidades como Zas (A Coruña) ou Moraña (Pontevedra), ademais dunha gran maioría de centros da provincia de Lugo, onde Norvento conta coa maior parte das súas instalacións de xeración de enerxía renovable e onde se atopa a súa sede, nunha aposta máis por contribuír á sociedade lucense e galega coa súa actividade.