O edificio CIne de Norvento, 100% autosuficiente con renovables, recibe o Premio Especial á Sustentabilidade da Xunta de Galicia

• O premio forma parte dos Premios de Arquitectura e Rehabilitación 2018 da Comunidade Autónoma de Galicia.
  
• O edificio está 100% desconectado da rede eléctrica e de gas, é autosuficiente con enerxías renovables xeradas in situ e está construído con materiais locais e sostibles.

Lugo, 1 de outubro de 2018.-  O Centro de Innovación Norvento Enerxía (CIne), actual sede de Norvento, foi galardoado co Premio de Arquitectura e Rehabilitación da Comunidade Autónoma de Galicia, outorgado pola Xunta de Galicia na categoría de Premio Especial á Sustentabilidade.

O obxectivo destes Premios de Arquitectura organizados pola Xunta de Galicia é promover a excelencia na nosa arquitectura e rehabilitación recoñecendo a calidade dos edificios. O Premio Especial á Sustentabilidade pretende destacar a realización dunha arquitectura responsable e comprometida co medio ambiente, os recursos e as xeracións futuras en liña cos programas europeos e Horizonte Europa 2020.

O presidente e fundador de Norvento, Pablo Fernández Castro, mostrouse “orgulloso por este recoñecemento. A nosa intención con este proxecto era combinar sustentabilidade e tecnoloxía punta, este premio recoñece o esforzo de varios anos para conseguir ese obxectivo”.

Un edificio desconectado da rede

O edificio CIne, situado no parque empresarial das Gándaras, en Lugo, foi concibido desde a súa fase inicial de deseño como un edificio de enerxía cero, destinado a promover un novo modelo enerxético máis eficiente e respectuoso co medio ambiente. O deseño arquitectónico do CIne foi realizado polo recoñecido arquitecto navarro Patxi Mangado, e é o resultado de décadas de I+D+i por parte de Norvento.

Ten capacidade para 200 traballadores e é o principal centro de operacións e monitorización de parques eólicos de Norvento. As instalacións tamén inclúen un laboratorio para a experimentación con tecnoloxías renovables. O CIne é quen de cumprir con todas as súas necesidades enerxéticas -tanto electricidade como calefacción/refrixeración- a partir de diversas fontes renovables in situ, o que permite o edificio funcionar de forma independente, completamente desconectado da rede eléctrica e de gas. Isto é posible en parte grazas á integración de baterías, que permiten almacenar enerxía en momentos de alta produción e utilizala cando esta diminúe. A microrrede que abastece o edificio combina enerxía eólica, fotovoltaica e unha unidade de coxeración que utiliza aceite vexetal reciclado. Máis ou menos, o 35% da enerxía procede do vento, o 60% do sol e o 5% do aceite vexetal.

Este centro de innovación é un claro exemplo de como a tecnoloxía de Norvento pode axudar o sector industrial a alcanzar a autosuficiencia total e a autoxestión da enerxía a través das renovables.

Ademais, na súa construción utilizáronse materiais sostibles e locais para integralo na contorna e minimizar así o seu impacto ambiental. Estes criterios foron moi valorados pola Xunta de Galicia á hora de concederlle o Premio Especial á Sustentabilidade.

Sobre Norvento

Norvento é unha empresa española de tecnoloxías renovables con capacidade de actuación integral. Con sede en Lugo (Galicia), a compañía é 100% de capital español e leva máis de 35 anos operando no mercado. A actividade de Norvento abarca desde a fabricación de tecnoloxía, o deseño, promoción, construción e explotación de instalacións de enerxías renovables de xeración centralizada (parques eólicos fundamentalmente), ata proxectos de xeración distribuída para o sector industrial, así como solucións ad hoc de enxeñería enerxética. 

Cunha presenza activa en cinco mercados internacionais (Reino Unido, Brasil, Estados Unidos, Polonia e Italia), Norvento conta actualmente con 120 MW en funcionamento en España e un pipeline de máis de 540MW en diferentes fases de desenvolvemento.