O sistema de almacenaxe enerxético de Norvento Enerxía comeza a súa posta en marcha no Centro de Desenvolvemento de Tecnoloxías de CIUDEN

• O sistema nBESS de Norvento Enerxía, que está composto por baterías de ión-litio, conta cunha capacidade de 600 kVA e 1.330 kW/h.

• A instalación marca un importante fito no proxecto de almacenamento enerxético da Fundación Ciudad da Enerxía (CIUDEN) en Cubillos del Sil (León).

• Pola súa banda, Norvento Enerxía continúa apostando polo almacenamento enerxético como chave para avanzar cara á descarbonización da industria.

Norvento Enerxía, empresa galega líder en solucións enerxéticas renovables e avanzadas, comezou a posta en marcha o pasado mes de xaneiro do sistema de almacenamento enerxético electroquímico (nBESS) que forneceu ás instalacións do Centro de Desenvolvemento de Tecnoloxías de CIUDEN, situadas en Cubillos del Sil (León).

Este innovador sistema, que conta cunha capacidade de 600 kVA e 1.330 kWh, atópase xa en funcionamento, marcando un importante fito no proxecto de almacenamento enerxético e produción de hidróxeno verde de CIUDEN, enmarcado no Plan de Recuperación, Transformación e Resiliencia (PRTR) e financiado cos fondos Next Generation da Unión Europea.

A entrada en operación do sistema nBESS, reforza o obxectivo da Fundación da Cidade da Enerxía (CIUDEN), entidade do sector público estatal dependente do Ministerio para a Transición Ecolóxica e o Reto Demográfico (MITECO) e adscrita ao Instituto para a Transición Xusta (ITJ), de converterse nun referente na investigación e validación de tecnoloxías relacionadas coa xeración de hidróxeno verde e o almacenamento enerxético. Este sistema permitirá desenvolver e probar solucións innovadoras que contribúan á transición cara a un modelo enerxético máis sostible e eficiente.

Unha solución chave para o modelo enerxético do futuro

A licitación realizada por CIUDEN en outubro do ano pasado, abarcou desde a enxeñería e a subministración de compoñentes ata a obra civil, o mantemento durante o período de garantía e a posta en marcha definitiva do sistema. Co nBESS en pleno funcionamento, CIUDEN atópase un paso máis preto de alcanzar a integración de todas as tecnoloxías que forman parte do proxecto de produción de hidróxeno verde e almacenamento enerxético, que culmina a finais de ano e convértea nunha plataforma perfecta para a demostración das tecnoloxías de descarbonización para as empresas e para a sociedade.

En termos de innovación tecnolóxica, o nBESS está deseñado para garantir un alto rendemento a longo prazo. A súa flexibilidade operativa convérteo nunha ferramenta esencial non só para as probas e validacións de proxectos de xeración de hidróxeno verde, senón tamén para avanzar na investigación de novas aplicacións relacionadas coa transición enerxética.

A entrada en operación deste sistema pon de manifesto o papel crucial que desempeña o almacenamento enerxético na transición cara a un modelo enerxético descarbonizado. Tecnoloxías como o nBESS son a base para superar desafíos como a intermitencia das enerxías renovables, mellorar a eficiencia enerxética e fomentar a autosuficiencia de instalacións industriais e residenciais.

“Dende Norvento cremos que, sen almacenamento enerxético, a transición cara a un modelo máis sostible é inviable. Proxectos como o desenvolvido con CIUDEN son o exemplo de como a innovación pode facilitar solucións que nos acheguen cara á meta de construír un planeta máis eficiente e comprometido energéticamente”, destacou Juan Morilla, director de Operacións de Norvento Enerxía.

“CIUDEN ten o reto de apoiar iniciativas en investigación, desenvolvemento e innovación relacionadas coa xeración de enerxía renovable, almacenamento e minimización de posibles efectos adversos ao medio ambiente, actuando como impulsor do desenvolvemento de tecnoloxías de almacenamento de enerxía e hidróxeno renovable. Este sistema de almacenamento en baterías de ión-litio que acaba de poñerse en marcha permitiranos realizar a integración nun sistema híbrido e validar o seu potencial tecnolóxico”, asegurou Javier Quiñones, director executivo de I+D+i da Fundación Ciudad da Enerxía.