Pablo Fernández Castro, presidente de Norvento Enerxía, recibe o premio APD ao mellor directivo do ano

• O fundador e presidente do grupo tecnolóxico galego do sector das enerxías renovables máis disruptivo, dedicado ao deseño e fabricación de produtos para a xeración e almacenaxe de enerxía, así como o desenvolvemento e operación, tanto de grandes plantas de enerxía renovable como de autoconsumo, foi galardoado pola asociación de directivos en recoñecemento ao seu papel no desenvolvemento e crecemento de Galicia.

• Da man da conselleira de Economía, Industria e Innovación, Mª Jesús Lorenzana, e en presenza da directiva de APD e o xurado responsable do fallo, Pablo Fernández Castro recolleu o galardón que pon en valor os seus máis de 40 anos de brillante traxectoria empresarial.

• O presidente de Norvento fixo fincapé na necesidade de seguir incrementando a penetración de renovables en Galicia, comunidade importadora de enerxía fósil e contaminante, e en apostar por empresas cun proxecto sólido e con raíces na terra, para converter esa necesidade nunha oportunidade de desenvolvemento económico para a nosa comunidade.

Pablo Fernández Castro, presidente de Norvento Enerxía, recibiu hoxe en Santiago de Compostela o Premio ao Directivo do Ano por parte da asociación para o Progreso da Dirección (APD), na súa delegación Noroeste.

Fundador e presidente dende a década dos 80 do grupo tecnolóxico galego do sector das enerxías renovables máis disruptivo, dedicado ao deseño e fabricación de produtos para a xeración e almacenamento de enerxia, así como ao desenvolvemento e operación, tanto de grandes plantas de enerxía renovable como de autoconsumo, foi galardoado pola asociación de directivos en recoñecemento ao seu papel no desenvolvemento e crecemento de Galicia.

Nun acto de  celebrado este mediodía no Centro Abanca Obra Social da capital galega, a conselleira de Economía, Industria e Innovación da Xunta de Galicia, Mª Jesús Lorenzana, en presenza da directiva de APD Noroeste e o xurado responsable do fallo, fixo entrega ao empresario lucense do galardón que recoñece a súa brillante traxectoria e a súa actitude visionaria nun sector que, nos anos 80 e no mundo, xeraba aínda moitas incertezas.

Durante a ceremonia de entrega, a segunda consecutiva que APD organiza para premiar a un directivo galego, Mª Jesús Lorenzana definiu a Pablo Fernández Castro como “un líder excepcional galego no mundo empresarial, que alcanzou logros extraordinarios para Galicia”. Así mesmo destacou del “o seu talento, compromiso e excelencia, méritos que se labrou durante toda a súa traxectoria desde que comezou no sector, na década dos oitenta”.

A directiva de APD e o xurado, representados por Francisco Botas, presidente da asociación na zona noroeste, sinalaron que “Pablo Fernández Castro soubo ver nun momento de incerteza, o potencial das enerxías renovables, logrando anos máis tarde cumplir o seu gran sono: crear un área tecnolóxica dentro de Norvento”.

Pola súa banda, Pablo Fernández Castro agradeceu a APD a entrega do galardón e ás diferentes autoridades e asistentes a súa presenza, facendo especial mención aos membros do equipo de Norvento Enerxía, “con quen sinto que debo compartir este premio, xa que levan anos acompañándome para que Norvento sexa o que é hoxe”, destacou.

Unha oportunidade xurdida dunha crise

Durante o transcurso do acto, Pablo Fernández Castro mantivo así mesmo un diálogo ti a ti con Alfredo Ramos, director xeral de R e Grupo MásMóvil en Galicia, no que revelou como foron os inicios de Novento Enerxía: “Cando era xoven impactoume sobremaneira as consecuencias que tivo en Europa a crise enerxética dos anos 70, o que me reafirmou no meu desexo de estudar enxeñería. Cando terminei a miña formación, a miña aposta por enfocarme no sector das enerxías renovables, onde todo estaba por facer, foi firme e clara clara”, apuntou durante a súa intervención.

Así mesmo, quixo facer fincapé na súa paixón pola tecnoloxía, a que lle levou a impulsar unha división tecnolóxica dentro de Norvento, unha aposta persoal que supón o valor diferencial da compañía: “Pola miña vocación e formación como enxeñeiro, son un apaixoado da tecnoloxía. Na transición cara unha economía descarbonizada existen grandes oportunidades, e entre elas Norvento vai un paso máis aló. Non só estamos a construir e operar instalacións de enerxía renovable, senón que tamén estamos a desenvolver tecnoloxía renovable, como son os aeroxeradores de media potencia e os sistemas de almacenamento de enerxía. Con esta posición non só contribuímos á independencia enerxética, senón que tamén á independencia tecnolóxica, e ademais creamos actividade tecnolóxica e industrial en Galicia”.

Da mesma forma, e durante a conversación mantida co principal directivo da empresa de telefonía, Pablo Fernández Castro quixo deixar patente a necesidade de seguir incrementando a penetración das enerxías renovables en Galicia, comunidade que, a pesar da estendida crenza de que é excedentaria en producción de enerxía verde, continua importando máis dun 50% de enerxía, a maioría de orixe fósil: “A nivel enerxético Galicia segue sendo unha rexión contaminante e dependente de terceiros países. Aínda que é verdade que estamos, comparativamente, ben situados a nivel nacional e europeo, o certo é que máis da metade da enerxía que se consome en Galicia é fósil, contaminante, contribúe a agravar a emerxencia climática e temos que importala do exterior. Polo tanto, as enerxías renovables son, en primeiro lugar, unha necesidade. Necesitamos moita máis enerxía renovable e, en Galicia, esa enerxía renovable é a enerxía eólica. Indubidablemente, temos que ser capaces de converter esa necesidade nunha oportunidade de desenvolvemento económico para Galicia. E iso dependerá, en gran medida, de como abordemos algúns aspectos clave”.