O proxecto MODUL nace como resposta á necesidade detectada de redución do custo da electricidade en zonas remotas do planeta. Dita misión vén responder á necesidade detectada de mellora loxística asociada á instalación dos sistemas de enerxía renovable neste tipo de emprazamentos remotos, posibilitando o seu transporte, despregamento e instalación, reducindo á vez os custos asociados aos mesmos.
Para afrontar este ambicioso reto, consolidouse un consorcio multisectorial de PEMES galegas, coas capacidades e o coñecemento necesario para cubrir todas as actividades do proxecto: Norvento Tecnología, Norvento Ingeniería, Norvento nED Factory, TEMHA e Artabro- Samdeu.
Ademais, as empresas contan coa colaboración de CETIM (Centro Tecnolóxico de Investigación Multisectorial) e CITEEC (Centro de Innovación en Edificación e Enxeñería Civil).
O proxecto dividiuse en 5 actividades:
- Recompilación e caracterización
- Deseño modular do aeroxerador
- Sistema Modular de cimentación
- Desenvolvementos loxísticos e sistema de autoizado integral
- Interacción de subsistemas e probas en campo
A Actividade 1 foi completada ao 100% na primeira anualidade do proxecto, finalizada en novembro de 2018. Nela participaron todas as entidades que conforman o consorcio, así como os centros de investigación involucrados. A finalización desta actividade supuxo a definición do Benchmark de concepto de operación por competidores, as especificacións de requisitos do sistema, a definición das probas de aceptación e os requisitos dos subsistemas que deron lugar ao deseño preliminar.
Unha vez finalizada esta primeira actividade de definición de obxectivos, arrincaron en paralelo as Actividades 2, 3 e 4 no pasado mes de decembro de 2018. Estas tres actividades, lideradas por Norvento Tecnología, TEMHA e Ártabro- Samdeu respectivamente, centráronse nos 3 piares principais do proxecto: Aeroxerador modular, cimentación modular e desenvolvementos loxísticos de autoizado. A culminación das tarefas incluídas nestas actividades constituíu a antesala para executar a Actividade 5, a derradeira do proxecto.
A Actividade 5: Integración de subsistemas e probas en campo, liderada por Norvento nED Factory, culminou con éxito o pasado mes de decembro, cando levaron a cabo no Parque Eólico Experimental da Pastoriza, as manobras de demostración do conxunto de tecnoloxías desenvolvidas no Proxecto MODUL.
Con elas púxose punto final con éxito ao proxecto de I+D+i, cuxa misión foi desenvolver solucións capaces de facilitar a implantación de enerxía limpa en rexións remotas ou de difícil acceso nas cales exista escaseza de medios loxísticos. Entre as solucións desenvolvidas no proxecto, atópanse o deseño de cimentacións prefabricadas doadamente transportables ata o destino de instalación, ou a execución dun sistema de celosía autoelevable capaz de permitir o izado da totalidade dos compoñentes do aeroxerador nED100, eliminando a necesidade e o emprego de guindastres para a súa instalación completa.
O proxecto MODUL, enmarcado no programa CONECTA PEME 2018, está financiado pola Xunta de Galicia a través da Axencia Galega de Innovación ( GAIN) e o apoio da Consellería de Economía, Emprego e Industria e está cofinanciado con cargo a Fondos FEDER no marco do eixo 1 do programa operativo Feder Galicia 2014-2020.
